un ke ik jaan nisaar ham bhi hain

Un ke ik jaan-nisaar ham bhee hain Hain jahaan sau hazaar ham bhee hain Tum bhee bechain ham bhee hain bechain Tum bhee ho be-qaraar ham bhee hain Ai falak kah to kya iraada hai Aish ke khvaast-gaar ham bhee hain Kheench laa.egaa jazb-e-dil un ko Hama tan intizaar ham bhee hain Bazm-e-dushman men le chalaa hai dil Kaise be-ikhtiyaar ham bhee hain Shahr khaalee kiye dukaan kaisee Ek hee baada-khvaar ham bhee hain Sharm samjhe tire taghaaful ko Vaah kya hoshiyaar ham bhee hain Haath ham se milaao ai muusaa Aashiq-e-roo-e-yaar ham bhee hain Khwaish-e-baada-e-tuhoor nahin Kaise parhez-gaar ham bhee hain Tum agar apnee guun ke ho ma.ashooq Apne matlab ke yaar ham bhee hain Jis ne chaahaa phansaa liyaa ham ko Dilbaron ke shikaar ham bhee hain Aa.ee mai-khaane se ye kis kee sadaa Laao yaaron ke yaar ham bhee hain Le hee to legee dil nigaah tiree Har tarah hoshiyaar ham bhee hain Idhar aa kar bhee faatiha paDh lo Aaj zer-e-mazaar ham bhee hain Ghair kaa haal poochhiye ham se Us ke jalse ke yaar ham bhee hain Kaun saa dil hai jis men 'daagh' nahin Ishq men yaadgaar ham bhee hain