aap ki yaad aatii rahii raat bhar
— Faiz Ahmad Faiz
''aap kee yaad aatee rahi raat bhar''
Chaandnee dil dukhaatee rahi raat bhar
Gaah jaltee huee gaah bujhtee huee
Sham-e-gham jhilmilaatee rahi raat bhar
Koee khushboo badaltee rahi pairahan
Koee tasveer gaatee rahi raat bhar
Phir sabaa saaya-e-shaakh-e-gul ke tale
Koee qissa sunaatee rahi raat bhar
Jo na aayaa use koee zanjeer-e-dar
Har sadaa par bulaatee rahi raat bhar
Ek ummeed se dil bahaltaa raha
Ik tamannaa sataatee rahi raat bhar