ab ke baras dastuur e sitam men kya kya baab iizaad hue
— Faiz Ahmad Faiz
Ab ke baras dastoor-e-sitam men kya kya baab eezaad hue
Jo qaatil the maqtool hue jo said the ab sayyaad hue
Pahle bhee khizaan men baagh ujDe par yuun naheen jaise ab ke baras
Saare buuTe patta patta ravish ravish barbaad hue
Pahle bhee tavaaf-e-sham-e-wafa thee rasm mohabbat vaalon kee
Ham tum se pahle bhee yahaan 'mansoor' hue 'farhaad' hue
Ik gul ke murjhaane par kya gulshan men kohraam machaa
Ik chehra kumhlaa jaane se kitne dil naashaad hue
'faiz' na ham 'yoosuf' na koee 'yaaqoob' jo ham ko yaad kare
Apnee kya kan'aan men rahe yaa misr men jaa aabaad hue