ab vahii harf e junoon sab ki zabaan thahrii hai

Ab vahee harf-e-junoon sab kee zabaan Thahree hai Jo bhee chal niklee hai wo baat kahaan Thahree hai Aaj tak shaikh ke ikraam men jo shai thee haraam Ab vahee dushman-e-deen raahat-e-jaan Thahree hai Hai khabar garm ki phirtaa hai gurezaan naaseh Guftugoo aaj sar-e-koo-e-butaan Thahree hai Hai vahee aariz-e-lailaa vahee sheereen kaa dahan Nigah-e-shauq ghaDee bhar ko jahaan Thahree hai Vasl kee shab thee to kis darja subuk guzree thee Hijr kee shab hai to kya sakht giraan Thahree hai Bikhree ik baar to haath aa.ee hai kab mauj-e-shameem Dil se niklee hai to kab lab pe fughaan Thahree hai Dast-e-sayyaad bhee aajiz hai kaf-e-gul-cheen bhee Boo-e-gul Thahree na bulbul kee zabaan Thahree hai Aate aate yoonhee dam bhar ko rukee hogee bahaar Jaate jaate yoonhee pal bhar ko khizaan Thahree hai Ham ne jo tarz-e-fughaan kee hai qafas men eejaad 'faiz' gulshan men vahee tarz-e-bayaan Thahree hai