dil men ab yuun tire bhuule hue gam aate hain
— Faiz Ahmad Faiz
Dil men ab yuun tire bhoole hue gham aate hain
Jaise bichhDe hue kaabe men sanam aate hain
Ek ik kar ke hue jaate hain taare raushan
Meree manzil kee taraf tere qadam aate hain
Raqs-e-mai tez karo saaz kee lai tez karo
Soo-e-mai-khaana safeeraan-e-haram aate hain
Kuchh hameen ko naheen ehsaan uThaane kaa dimaagh
Wo to jab aate hain maa.il-ba-karam aate hain
Aur kuchh der na guzre shab-e-furqat se kaho
Dil bhee kam dukhtaa hai wo yaad bhee kam aate hain