donon jahaan terii mohabbat men haar ke
— Faiz Ahmad Faiz
Donon jahaan teree mohabbat men haar ke
Wo jaa raha hai koee shab-e-gham guzaar ke
Veeraan hai mai-kada khum-o-saaghar udaas hain
Tum kya ga.e ki rooth ga.e din bahaar ke
Ik fursat-e-gunaah milee wo bhee chaar din
Dekhe hain ham ne hausle parvardigaar ke
Dunya ne teree yaad se begaana kar diyaa
Tujh se bhee dil-fareb hain gham rozgaar ke
Bhoole se muskuraa to diye the wo aaj 'faiz'
Mat poochh valvale dil-e-naa-kardaa-kaar ke