duaa aaiye haath uthaaen ham bhii
— Faiz Ahmad Faiz
Aa.iye haath uThaa.en ham bhee
Ham jinhen rasm-e-duaa yaad nahin
Ham jinhen soz-e-mohabbat ke sivaa
Koee but koi khuda yaad nahin
Aa.iye arz guzaaren ki nigaar-e-hastee
Zahr-e-imroz men sheereeni-e-fardaa bhar de
Vo jinhen taab-e-giraan-baaree-e-ayyaam nahin
Un kee palkon pe shab o roz ko halkaa kar de
Jin kee aankhon ko rukh-e-sub.h kaa yaaraa bhee nahin
Un kee raaton men koi sham.a munavvar kar de
Jin ke qadmon ko kisee rah kaa sahaaraa bhee nahin
Un kee nazron pe koi raah ujaagar kar de
Jin kaa diin pairvi-e-kizb-o-riyaa hai un ko
Himmat-e-kufr mile jur.at-e-tahqeeq mile
Jin ke sar muntazir-e-tegh-e-jafaa hain un ko
Dast-e-qaatil ko jhaTak dene kee taufeeq mile
Ishq kaa sirr-e-nihaan jaan-e-tapaan hai jis se
Aaj iqraar karen aur tapish miT jaa.e
Harf-e-haq dil men khaTaktaa hai jo kaanTe kee tarah
Aaj iz.haar karen aur khalish miT jaa.e
Aaiye hath uThaen hum bhi
Hum jinhen rasm-e-dua yaad nahin
Hum jinhen soz-e-mohabbat ke siwa
Koi but koi KHuda yaad nahin
Aaiye arz guzaren ki nigar-e-hasti
Zahr-e-imroz mein shirini-e-farda bhar de
Wo jinhen tab-e-giran-bari-e-ayyam nahin
Un ki palkon pe shab o roz ko halka kar de
Jin ki aankhon ko ruKH-e-subh ka yara bhi nahin
Un ki raaton mein koi shama munawwar kar de
Jin ke qadmon ko kisi rah ka sahaara bhi nahin
Un ki nazron pe koi rah ujagar kar de
Jin ka din pairwi-e-kizb-o-riya hai un ko
Himmat-e-kufr mile jurat-e-tahqiq mile
Jin ke sar muntazir-e-tegh-e-jafa hain un ko
Dast-e-qatil ko jhaTak dene ki taufiq mile
Ishq ka sirr-e-nihan jaan-e-tapan hai jis se
Aaj iqrar karen aur tapish miT jae
Harf-e-haq dil mein khaTakta hai jo kanTe ki tarah
Aaj izhaar karen aur KHalish miT jae