go sab ko baham saagar o baada to nahin thaa
— Faiz Ahmad Faiz
Go sab ko baham saaghar o baada to naheen thaa
Ye shahr udaas itnaa ziyaada to naheen thaa
Galiyon men phiraa karte the do chaar divaane
Har shakhs kaa sad chaak labaada to naheen thaa
Manzil ko na pahchaane rah-e-ishq kaa raahee
Naadaan hee sahee aisa bhee saada to naheen thaa
Thak kar yoonhee pal bhar ke liye aankh lagee thee
So kar hee na uTThen ye iraada to naheen thaa
Vaa.iz se rah-o-rasm rahee rind se sohbat
Farq in men koee itnaa ziyaada to naheen thaa