gulon men rang bhare baad e nau bahaar chale

Gulon men rang bhare baad-e-nau-bahaar chale Chale bhee aao ki gulshan kaa kaarobaar chale Qafas udaas hai yaaro sabaa se Kuch to kaho Kaheen to bahr-e-khuda aaj zikr-e-yaar chale Kabhee to sub.h tire kunj-e-lab se ho aaghaaz Kabhee to shab sar-e-kaakul se mushk-baar chale BaDaa hai dard kaa rishta ye dil ghareeb sahee Tumhaare naam pe aa.enge gham-gusaar chale Jo ham pe guzree so guzree magar shab-e-hijraan Hamaare ashk tiree aaqibat sanvaar chale Huzoor-e-yaar huee daftar-e-junoon kee talab Girah men le ke garebaan kaa taar taar chale Maqaam 'faiz' koee raah men jachaa hee naheen Jo koo-e-yaar se nikle to soo-e-daar chale