har haqiiqat majaaz ho jaae
— Faiz Ahmad Faiz
Har haqeeqat majaaz ho jaa.e
Kaafiron kee namaaz ho jaa.e
Dil raheen-e-niyaaz ho jaa.e
Bekasee kaarsaaz ho jaa.e
Minnat-e-chaara-saaz kaun kare
Dard jab jaan-navaaz ho jaa.e
Ishq dil men rahe to rusvaa ho
Lab pe aa.e to raaz ho jaa.e
Lutf kaa intizaar kartaa hoon
Jaur taa hadd-e-naaz ho jaa.e
Umr be-sood kaT rahi hai 'faiz'
Kaash ifshaa-e-raaz ho jaa.e