is waqt to yuun lagtaa hai
— Faiz Ahmad Faiz
Is waqt to yuun lagtaa hai ab kuch bhee nahin hai
Mahtaab na suraj, na andheraa na saveraa
Aankhon ke dareechon pe kisee husn kee chilman
Aur dil kee panaahon men kisee dard kaa Deraa
Mumkin hai koi vahm tha, mumkin hai sunaa ho
Galiyon men kisee chaap kaa ik aakhiree pheraa
Shaakhon men khayaalon ke ghane peD kee shaayad
Ab aa ke karegaa na koi khvaab baseraa
Ik bair na ik mehr na ik rabt na rishta
Teraa koi apna, na paraayaa koi meraa
Maanaa ki ye sunsaan ghaDee sakht kaDee hai
Lekin mire dil ye to faqat ik hee ghaDee hai
Himmat karo jiine ko to ik umr paDee hai
Is waqt to yun lagta hai ab kuch bhi nahin hai
Mahtab na suraj, na andhera na sawera
Aankhon ke darichon pe kisi husn ki chilman
Aur dil ki panahon mein kisi dard ka Dera
Mumkin hai koi wahm tha, mumkin hai suna ho
Galiyon mein kisi chap ka ek aaKHiri phera
ShaKHon mein KHayalon ke ghane peD ki shayad
Ab aa ke karega na koi KHwab basera
Ek bair na ek mehr na ek rabt na rishta
Tera koi apna, na paraya koi mera
Mana ki ye sunsan ghaDi saKHt kaDi hai
Lekin mere dil ye to faqat ek hi ghaDi hai
Himmat karo jine ko to ek umr paDi hai