kab yaad men teraa saath nahin kab haat men teraa haat nahin

Kab yaad men teraa saath naheen kab haat men teraa haat naheen Sad-shukr ki apnee raaton men ab hijr kee koee raat naheen Mushkil hain agar haalaat vahaan dil bech aa.en jaan de aa.en Dil vaalo koocha-e-jaanaan men kya aise bhee haalaat naheen Jis dhaj se koee maqtal men gaya wo shaan salaamat rahtee hai Ye jaan to aanee jaanee hai is jaan kee to koee baat naheen Maidaan-e-wafa darbaar naheen yaan naam-o-nasab kee poochh kahaan Aashiq to kisee kaa naam naheen Kuch ishq kisee kee zaat naheen Gar baazee ishq kee baazee hai jo chaaho lagaa do Dar kaisaa Gar jiit ga.e to kya kahnaa haare bhee to baazee maat naheen