kutte ye galiyon ke aavaara be kaar kutte
— Faiz Ahmad Faiz
Ye galiyon ke aavaara be-kaar kutte
Ki bakhshaa gaya jin ko zauq-e-gadaa.ee
Zamaane kee phaTkaar sarmaaya in kaa
Jahaan bhar kee dhutkaar in kee kamaa.ee
Na aaraam shab ko na raahat savere
Ghalaazat men ghar naaliyon men basere
Jo bigDen to ik doosre ko laDaa do
Zaraa ek roTee kaa TukDaa dikhaa do
Ye har ek kee Thokaren khaane vaale
Ye faaqon se uktaa ke mar jaane vaale
Ye mazloom makhlooq gar sar uThaa.e
To insaan sab sar-kashee bhuul jaa.e
Ye chaahen to dunya ko apna banaa len
Ye aaqaaon kee haDDiyaan tak chabaa len
Koee in ko ehsaas-e-zillat dilaa de
Koee in kee soee huee dum hilaa de
Ye galiyon ke aawara be-kar kutte
Ki baKHsha gaya jin ko zauq-e-gadai
Zamane ki phaTkar sarmaya in ka
Jahan bhar ki dhutkar in ki kamai
Na aaram shab ko na rahat sawere
Ghalazat mein ghar naliyon mein basere
Jo bigDen to ek dusre ko laDa do
Zara ek roTi ka TukDa dikha do
Ye har ek ki Thokaren khane wale
Ye faqon se ukta ke mar jaane wale
Ye mazlum maKHluq gar sar uThae
To insan sab sar-kashi bhul jae
Ye chahen to duniya ko apna bana len
Ye aaqaon ki haDDiyan tak chaba len
Koi in ko ehsas-e-zillat dila de
Koi in ki soi hui dum hila de