mauzuu e sukhan gul huii jaatii hai afsurda sulagtii huii shaam

Gul huee jaatee hai afsurda sulagtee huee shaam Dhul ke niklegee abhee chashma-e-mahtaab se raat Aur mushtaaq nigaahon kee sunee jaa.egee Aur un haathon se mas honge ye tarse hue haat Un kaa aanchal hai ki rukhsaar ki pairaahan hai Kuchh to hai jis se huee jaatee hai chilman rangeen Jaane us zulf kee mauhoom ghanee chhaanv men TimTimaataa hai wo aaveza abhee tak ki nahin Aaj phir husn-e-dil-aaraa kee vahee dhaj hogee Vahee khvaabeeda see aankhen vahee kaajal kee lakeer Rang-e-rukHsaar pe halkaa saa wo ghaaze kaa ghubaar Sandalee haath pe dhundlee see hinaa kee tahreer Apne afkaar kee ash.aar kee dunya hai yahee Jaan-e-mazmoon hai yahee shaahid-e-ma.anee hai yahee Aaj tak surkh o siyah sadiyon ke saa.e ke tale Aadam o havvaa kee aulaad pe kya guzree hai? Maut aur ziist kee rozaana saf-aaraa.ee men Ham pe kya guzregee ajdaad pe kya guzree hai? In damakte hue shahron kee faraavaan makhlooq Kyuun faqat marne kee hasrat men jiyaa kartee hai Ye haseen khet phaTaa paDtaa hai jauban jin kaa! Kis liye in men faqat bhuuk ugaa kartee hai Ye har ik samt pur-asraar kaDee deevaaren Jal-bujhe jin men hazaaron kee javaanee ke charaagh Ye har ik gaam pe un khawabon kee maqtal-gaahen Jin ke partav se charaaghaan hain hazaaron ke dimaagh Ye bhee hain aise ka.ee aur bhee mazmoon honge Lekin us shokh ke aahista se khulte hue honT Haa.e us jism ke kambakht dil-aavez khutoot Aap hee kahiye kaheen aise bhee afsoon honge Apnaa mauzu-e-sukhan un ke sivaa aur nahin Tab.a-e-shaa.er kaa vatan un ke sivaa aur nahin Gul hui jati hai afsurda sulagti hui sham Dhul ke niklegi abhi chashma-e-mahtab se raat Aur mushtaq nigahon ki suni jaegi Aur un hathon se mas honge ye tarse hue hat Un ka aanchal hai ki ruKHsar ki pairahan hai Kuchh to hai jis se hui jati hai chilman rangin Jaane us zulf ki mauhum ghani chhanw mein TimTimata hai wo aaweza abhi tak ki nahin Aaj phir husn-e-dil-ara ki wahi dhaj hogi Wahi KHwabida si aankhen wahi kajal ki lakir Rang-e-rukHsar pe halka sa wo ghaze ka ghubar Sandali hath pe dhundli si hina ki tahrir Apne afkar ki ashaar ki duniya hai yahi Jaan-e-mazmun hai yahi shahid-e-mani hai yahi Aaj tak surKH o siyah sadiyon ke sae ke tale Aadam o hawwa ki aulad pe kya guzri hai? Maut aur zist ki rozana saf-arai mein Hum pe kya guzregi ajdad pe kya guzri hai? In damakte hue shahron ki farawan maKHluq Kyun faqat marne ki hasrat mein jiya karti hai Ye hasin khet phaTa paDta hai jauban jin ka! Kis liye in mein faqat bhuk uga karti hai Ye har ek samt pur-asrar kaDi diwaren Jal-bujhe jin mein hazaron ki jawani ke charagh Ye har ek gam pe un KHwabon ki maqtal-gahen Jin ke partaw se charaghan hain hazaron ke dimagh Ye bhi hain aise kai aur bhi mazmun honge Lekin us shoKH ke aahista se khulte hue honT Hae us jism ke kambaKHt dil-awez KHutut Aap hi kahiye kahin aise bhi afsun honge Apna mauzu-e-suKHan un ke siwa aur nahin Taba-e-shaer ka watan un ke siwa aur nahin