na ganvaao naavak e niim kash dil e reza reza ganvaa diyaa

Na ganvaao naavak-e-neem-kash dil-e-reza-reza ganvaa diyaa Jo bache hain sang sameT lo tan-e-daagh-daagh luTaa diyaa Mire chaara-gar ko naved ho saf-e-dushmanaan ko khabar karo Jo wo qarz rakhte the jaan par wo hisaab aaj chukaa diyaa Karo kaj jabeen pe sar-e-kafan mire qaatilon ko gumaan na ho Ki ghuroor-e-ishq kaa baankpan pas-e-marg ham ne bhulaa diyaa Udhar ek harf ki kushtanee yahaan laakh uzr thaa guftanee Jo kahaa to sun ke uDaa diyaa jo likhaa to paDh ke miTaa diyaa Jo ruke to koh-e-giraan the ham jo chale to jaan se guzar ga.e Rah-e-yaar ham ne qadam qadam tujhe yaadgaar banaa diyaa