nahin nigaah men manzil to justujuu hi sahii
— Faiz Ahmad Faiz
Naheen nigaah men manzil to justujoo hee sahee
Naheen visaal mayassar to aarzoo hee sahee
Na tan men Khoon faraaham na ashk aankhon men
Namaaz-e-shauq to vaajib hai be-vuzoo hee sahee
Kisee tarah to jame bazm mai-kade vaalo
Naheen jo baada-o-saaghar to haav-hoo hee sahee
Gar intizaar kaThin hai to jab talak ai dil
Kisee ke waada-e-fardaa kee guftugoo hee sahee
Dayaar-e-ghair men mahram agar naheen koee
To 'faiz' zikr-e-vatan apne roo-ba-roo hee sahee