nasiib aazmaane ke din aa rahe hain
— Faiz Ahmad Faiz
Naseeb aazmaane ke din aa rahe hain
Qareeb un ke aane ke din aa rahe hain
Jo dil se kahaa hai jo dil se sunaa hai
Sab un ko sunaane ke din aa rahe hain
Abhee se dil o jaan sar-e-raah rakh do
Ki luTne luTaane ke din aa rahe hain
Tapakne lagee un nigaahon se mastee
Nigaahen churaane ke din aa rahe hain
Sabaa phir hamen poochhtee phir rahi hai
Chaman ko sajaane ke din aa rahe hain
Chalo 'faiz' phir se kaheen dil lagaa.en
Sunaa hai Thikaane ke din aa rahe hain