raqiib se aa ki vaabasta hain us husn ki yaaden tujh se

Aa ki vaabasta hain us husn kee yaaden tujh se Jis ne is dil ko paree-khaana banaa rakkhaa tha Jis kee ulfat men bhulaa rakkhee thee dunya ham ne Dahr ko dahr kaa afsaana banaa rakkhaa tha Aashnaa hain tire qadmon se wo raahen jin par Us kee mad.hosh javaanee ne inaayat kee hai Kaarvaan guzre hain jin se usee raanaa.ee ke Jis kee in aankhon ne be-sood ibaadat kee hai Tujh se khelee hain wo mahboob havaa.en jin men Us ke malboos kee afsurda mahak baaqee hai Tujh pe barsaa hai usee baam se mahtaab kaa nuur Jis men biitee huee raaton kee kasak baaqee hai Too ne dekhee hai wo peshaanee wo rukhsaar wo honT Zindagee jin ke tasavvur men luTaa dee ham ne Tujh pe uTThee hain wo khoee huee saahir aankhen Tujh ko ma.aloom hai kyuun umr ganvaa dee ham ne Ham pe mushtarka hain ehsaan gham-e-ulfat ke Itne ehsaan ki ginvaa.oon to ginvaa na sakoon Ham ne is ishq men kya khoyaa hai kya seekhaa hai Juz tire aur ko samjhaa.oon to samjhaa na sakoon Aajizee seekhee ghareebon kee himaayat seekhee Yaas-o-hirmaan ke dukh-dard ke ma.anee seekhe Zer-daston ke masaa.ib ko samajhnaa seekhaa Sard aahon ke rukh-e-zard ke ma.anee seekhe Jab kaheen baith ke rote hain wo bekas jin ke Ashk aankhon men bilakte hue so jaate hain Naa-tavaanon ke nivaalon pe jhapaTte hain uqaab Baazoo tole hue manDlaate hue aate hain Jab kabhi biktaa hai baazaar men mazdoor kaa gosht Shaah-raahon pe ghareebon kaa lahoo bahtaa hai Aag see siine men rah rah ke ubaltee hai na poochh Apne dil par mujhe qaaboo hee nahin rahtaa hai Aa ki wabasta hain us husn ki yaaden tujh se Jis ne is dil ko pari-KHana bana rakkha tha Jis ki ulfat mein bhula rakkhi thi duniya hum ne Dahr ko dahr ka afsana bana rakkha tha Aashna hain tere qadmon se wo rahen jin par Us ki madhosh jawani ne inayat ki hai Karwan guzre hain jin se usi ranai ke Jis ki in aankhon ne be-sud ibaadat ki hai Tujh se kheli hain wo mahbub hawaen jin mein Us ke malbus ki afsurda mahak baqi hai Tujh pe barsa hai usi baam se mahtab ka nur Jis mein biti hui raaton ki kasak baqi hai Tu ne dekhi hai wo peshani wo ruKHsar wo honT Zindagi jin ke tasawwur mein luTa di hum ne Tujh pe uTThi hain wo khoi hui sahir aankhen Tujh ko malum hai kyun umr ganwa di hum ne Hum pe mushtarka hain ehsan gham-e-ulfat ke Itne ehsan ki ginwaun to ginwa na sakun Hum ne is ishq mein kya khoya hai kya sikha hai Juz tere aur ko samjhaun to samjha na sakun Aajizi sikhi gharibon ki himayat sikhi Yas-o-hirman ke dukh-dard ke mani sikhe Zer-daston ke masaib ko samajhna sikha Sard aahon ke ruKH-e-zard ke mani sikhe Jab kahin baith ke rote hain wo bekas jin ke Ashk aankhon mein bilakte hue so jate hain Na-tawanon ke niwalon pe jhapaTte hain uqab Bazu tole hue manDlate hue aate hain Jab kabhi bikta hai bazar mein mazdur ka gosht Shah-rahon pe gharibon ka lahu bahta hai Aag si sine mein rah rah ke ubalti hai na puchh Apne dil par mujhe qabu hi nahin rehta hai