wafa e waada nahin waada e digar bhi nahin
— Faiz Ahmad Faiz
Wafa-e-waada nahin waada-e-digar bhee nahin
Wo mujh se rooThe to the lekin is qadar bhee nahin
Baras rahi hai hareem-e-havas men daulat-e-husn
Gadaa-e-ishq ke kaase men ik nazar bhee nahin
Na jaane kis liye ummeed-vaar baiThaa hoon
Ik aisi raah pe jo teree rahguzar bhee nahin
Nigaah-e-shauq sar-e-bazm be-hijaab na ho
Wo be-khabar hee sahee itne be-khabar bhee nahin
Ye ahd-e-tark-e-mohabbat hai kis liye aakhir
Sukoon-e-qalb udhar bhee nahin idhar bhee nahin