ajiib tajraba aankhon ko hone vaalaa thaa
— Farhat Ehsas
Ajiib tajraba aankhon ko hone vaalaa thaa
Baghair niind main kal raat sone vaalaa thaa
Tabhee vaheen mujhe us kee hansee sunaa.ee paDee
Main us kee yaad men palken bhigone vaalaa thaa
Kisee badan kee sadaa ne bachaa liyaa mujh ko
Main varna ruuh ke jangal men khone vaalaa thaa
Ye soch soch ke ab to hansee see aatee hai
Shuroo-e-ishq men kitnaa main rone vaalaa thaa
Kabhi huee na mulaaqaat shahr se meree
Main jab bhee so ke uThaa shahr sone vaalaa thaa
Agar yahee hai mohabbat to hone vaalee thee
Wo milne vaalaa thaa mujh ko main khone vaalaa thaa
Mujhe nikaal diyaa ta.aziyat ke jalse se
Ki bas vahaan main akelaa hee rone vaalaa thaa
Ye meraa deeda-e-tar khushk ho gaya varna
Mire liye bhee yahaan koi rone vaalaa thaa
Is aa.ine ne usoolon pe zid na kee varna
Main apne aap ke bar-aks hone vaalaa thaa
Kisee ne mahfil-e-Dunya kee dhun badal Daalee
Zamaana jab miraa ham-raqs hone vaalaa thaa
Vahaan bas ik dil-e-khaalee thaa aur miyaan-'ehsaas'
Na ishq un ko huaa thaa na hone vaalaa thaa