ba zaahir to badan bhar kaa ilaaqa gher rakkhaa hai

Ba-zaahir to badan-bhar kaa 'ilaaqa gher rakkhaa hai Magar andar se ham ne shahr sara gher rakkhaa hai Main paspaa fauj-e-dil kaa aakhiree zakhmee sipaahee hoon Magar ik 'umr se dushman ko tanhaa gher rakkhaa hai Kabhi is raushnee kee qaid se baahar bhee niklo tum Hujoom-e-husn ne saara saraapaa gher rakkhaa hai Museebat men paDaa hai in dinon meraa dil-e-vahshee Samajh kar shahr vaalon ne darinda gher rakkhaa hai Mohabbat kaa khuda hoon main magar aisa khuda jis ne BaDee mushkil se apna ek banda gher rakkhaa hai Bahut pahle kabhi paidaa hue aur mar ga.e the ham Usee maazee ne mustaqbil hamaaraa gher rakkhaa hai Koi eemaan vaalaa ahl-e-masjid se kahe jaa kar Khuda ko kyuun unhonne kaafiraana gher rakkhaa hai Chalo ham 'farhat-ehsaas' apna masjid se chhuDaa laa.en Khuda vaalon ne ik kaafir hamaaraa gher rakkhaa hai