badan aur ruuh men jhagdaa padaa hai
— Farhat Ehsas
Badan aur ruuh men jhagDaa paDaa hai
Ki hissa ishq men kis kaa baDaa hai
Hujoom-e-girya se hoon dar-ba-dar main
Ki ghar men sar talak paanee khaDaa hai
Bulaatee hai mujhe deevaar-e-Dunya
Jahaan har jism eenTon saa jaDaa hai
JhinjhoDaa hai abhee kis zalzale ne
Zameen se zindagee saa kya jhaDaa hai
Faqat aankhen hee aankhen rah ga.ee hain
Ki saaraa shahr miTTee men gaDaa hai
Tumhaaraa aks hai yaa aks-e-Dunya
Tazabzub saa Kuch aankhon men paDaa hai
Main Dariya jaan bachaataa phir raha hoon
Koee saahil mire peechhe paDaa hai
Zaraa see sharm bhee kar farhat-'ehsaas'
Badan teraa ajab chiknaa ghaDaa hai