bahut zameen bahut aasmaan milenge tumhen
— Farhat Ehsas
Bahut zameen bahut aasmaan milenge tumhen
Pa ham se khaak ke putle kahaan milenge tumhen
Khareed lo abhee baazaar men na.e hain ham
Ki baa'd men to bahut hee giraan milenge tumhen
Ab ibtidaa-e-safar hai to jo hai kah sun lo
Ham us ke baa'd na jaane kahaan milenge tumhen
Jo raaste men mile koee masjid-e-veeraan
To ham vaheen kaheen vaqt-e-azaan milenge tumhen
Ham intihaa men milenge gar ibtidaa men naheen
Naheen vahaan bhee to phir darmiyaan milenge tumhen
Thahar hee jaa.enge aakhir kaheen janaab-'ehsaas'
Par apne sher men yuun hee ravaan milenge tumhen