hai shor saahilon par sailaab aa raha hai
— Farhat Ehsas
Hai shor saahilon par sailaab aa raha hai
Aankhon ko gharq karne phir khvaab aa raha hai
Bas ek jism de kar rukhsat kiyaa tha us ne
Aur ye kahaa tha baaqee asbaab aa raha hai
Khaak-e-visaal kya kya soorat badal rahi hai
Suraj guzar chukaa hai mahtaab aa raha hai
Paanee ke aa.ine men kya aankh paD ga.ee hai
Dariya men kaisaa kaisaa girdaab aa raha hai
Aankhon kee pyaaliyon men baarish machee huee hai
Sahraa men koi manzar shaadaab aa raha hai