hamen jab apna taaaruf karaanaa padtaa hai
— Farhat Ehsas
Hamen jab apna ta.aaruf karaanaa paDtaa hai
Na jaane kitne dukhon ko dabaanaa paDtaa hai
Ab aa raha ho koee jism is tasavvuf se
To ham ko halqa-e-bai.at baDhaanaa paDtaa hai
Kisee ko niind na aatee ho raushnee men agar
To khud charaagh-e-mohabbat bujhaanaa paDtaa hai
Bahut ziyaada hain khatre badan kee mahfil men
Par apnee ek hee mahfil hai jaanaa paDtaa hai
Khuda hai qaadir-e-mutlaq ye baat khultee hai tab
Jab us se kaam koee kaafiraana paDtaa hai
Bahut ziyaada khushee se vafaat paa gaya ho
To aise dil ko dukhaa kar jilaanaa paDtaa hai
Hamaare paas yahee shaa.iree kaa sikka hai
UlaT-palaT ke isee ko chalaanaa paDtaa hai
Sunaa hai tum mire dil kee taraf se guzre the
Isee taraf to miraa kaarkhaana paDtaa hai
Ajiib tarz-e-taghazzul hai ye miyaan 'ehsaas'
Ki jism-o-rooh ko ik sur men gaanaa paDtaa hai