har ik jaanib un aankhon kaa ishaara jaa raha hai
— Farhat Ehsas
Har ik jaanib un aankhon kaa ishaara jaa raha hai
Hamen kin imtihaanon se guzaaraa jaa raha hai
Kinaare ko bachaa.oon to nadee jaatee hai mujh se
Nadee ko thaamtaa hoon to kinaaraa jaa raha hai
Main Duubaa jaa raha hoon un sadaaon ke bhanvar men
Mujhe ab chaaron jaanib se pukaaraa jaa raha hai
Ta'aaqub mat karo us ke badan kee raushnee kaa
Ki ye to sirf us kaa isti'aara jaa raha hai
Ye sara khel fat.h-e-shaah kaa hai jis kee khaatir
Pyaadon jaise insaanon ko haaraa jaa raha hai
Ab us rukhsaar kaa til hai 'alaamat us bhanvar kee
Jahaan sara samarqand-o-bukhaaraa jaa raha hai
Mire ash'aar hain wo aasmaanee khvaab jin ko
Miree miTTee ke honThon par utaaraa jaa raha hai
Vaheen chashm-o-lab-o-rukhsaar bhee jaate hain us ke
Jahaan ye husn kaa sara idaara jaa raha hai
Main saahil ho gaya hoon jab se wo Dariya huaa hai
Nazar Thahree huee hai aur nazaaraa jaa raha hai
To kya ye vasl kee shab hai ki jab ghar se bichhaD ke
Na jaane kis ke ghar meraa sitaaraa jaa raha hai
Alam-bardaar-e-tanhaa.ee thaa apna 'farhat-ehsaas'
Hujoom-e-shahr ke haathon jo maaraa jaa raha hai