huii ik khvaab se shaadii mirii tanhaaii ki

Huee ik khvaab se shaadee miree tanhaa.ee kee Pahlee beTee hai udaasee miree tanhaa.ee kee Abhee ma.aloom nahin kitne hain zaatee asbaab Kitnee vaj.hen hain samaajee miree tanhaa.ee kee Jaa ke dekhaa to khulaa raunaq-e-baazaar kaa raaz Ek ik chiiz banee thee miree tanhaa.ee kee Shahr-dar-shahr jo ye anjuman.en hain aabaad Tarbiyat-gaahen hain saaree miree tanhaa.ee kee Sirf aa.eena-e-aaghosh-e-mohabbat men milee Ek tanhaa.ee javaabee miree tanhaa.ee kee Saaf hai chehra-e-qaatil miree aankhon men magar Mo'tabar kab hai gavaahee miree tanhaa.ee kee Haasil-e-vasl sifar hijr kaa haasil bhee sifar Jaane kaisee hai riyaazee miree tanhaa.ee kee Kisee haalat men bhee tanhaa nahin hone detee Hai yahee ek kharaabee miree tanhaa.ee kee Main jo yuun phirtaa hoon mai-khaanon men but-khaanon men Hai yahee roza namaazee miree tanhaa.ee kee 'farhat-ehsaas' wo ham-zaad hai meraa jis ne Shahr men dhuum machaa dee miree tanhaa.ee kee