jo ishq chaahtaa hai wo honaa nahin hai aaj
— Farhat Ehsas
Jo ishq chaahtaa hai wo honaa naheen hai aaj
Khud ko bahaal karnaa hai khonaa naheen hai aaj
Aankhon ne dekhte hee use ghul machaa diyaa
Tai to yahee huaa thaa ki ronaa naheen hai aaj
Ye raat ahl-e-hijr ke khawabon kee raat hai
Qissa tamaam karnaa hai sonaa naheen hai aaj
Jo apne ghar men hai wo hai baazaar men naheen
Honaa kisee kaa shahr men honaa naheen hai aaj
Phir tifl-e-dil hai daulat-e-Dunya pe girya-baar
Aur mere paas koee khilaunaa naheen hai aaj