kabhi khuda kabhi insaan rok letaa hai

Kabhee khuda kabhee insaan rok letaa hai Main jab bhee jaataa hoon darbaan rok letaa hai Baghair chaak kiye ghar se main agar nikloon To mujh ko meraa garebaan rok letaa hai Main jab bhee jism se izn-e-vidaa.a maangtaa hoon Wo kah ke mujh ko miree jaan rok letaa hai Bas ek jast men Dunya ke paar utar jaa.oon Magar mujhe meraa saamaan rok letaa hai Bahaana chaahiye mujh ko bhee koee rukne kaa So wo ba-heela-e-aasaan rok letaa hai Main apne kufr se sharminda hoon ki us kee taraf Mire qadam miraa eemaan rok letaa hai Faraar ho ga.ee hotee kabhee kee ruuh miree Bas ek jism kaa ehsaan rok letaa hai Kabhee to aa.enge 'ehsaas-jee' kee bai.at men Hamen yahee bas ik imkaan rok letaa hai