main ronaa chaahtaa hoon khuub ronaa chaahtaa hoon main
— Farhat Ehsas
Main ronaa chaahtaa hoon khuub ronaa chaahtaa hoon main
Aur is ke ba.ad gahree niind sonaa chaahtaa hoon main
Tire honTon ke sahraa men tiree aankhon ke jangal men
Jo ab tak paa chukaa hoon us ko khonaa chaahtaa hoon main
Ye kachchee miTTiyon kaa Dher apne chaak par rakh le
Tiree raftaar kaa ham-raqs honaa chaahtaa hoon main
Tiraa saahil nazar aane se pahle is samundar men
Havas ke sab safeenon ko Dubonaa chaahtaa hoon main
Kabhee to fasl aa.egee jahaan men mere hone kee
Tiree khaak-e-badan men khud ko bonaa chaahtaa hoon main
Mire saare badan par dooriyon kee khaak bikhree hai
Tumhaare saath mil kar khud ko dhonaa chaahtaa hoon main