mohabbat chaahte ho kyuun wafa kyuun maangte ho
— Farhat Ehsas
Mohabbat chaahte ho kyuun wafa kyuun maangte ho
Tum un beemaar aankhon se davaa kyuun maangte ho
Musaafir ho to niklo paanv men aankhen lagaa kar
Kisee bhee ham-safar se raasta kyuun maangte ho
Unhen to khud hee apnee jaan ke laale paDe hain
Bichaare shahr vaalon se havaa kyuun maangte ho
Abhee Kuch thaa abhee Kuch hai badan aab-e-ravaan saa
Badan se aaj-kal kaa vaaqi.a kyuun maangte ho
Hudood-e-khaak se baahar naheen aa paa.egaa husn
Wo jitnaa hai use us se sivaa kyuun maangte ho
Hujoom-e-shahr men se tiir se nikle chale jaao
Hujoom-e-shahr se us kee razaa kyuun maangte ho
Mohabbat aap hee apna sila hai 'farhat-ehsaas'
Mohabbat kar rahe ho to sila kyuun maangte ho