raah ki Kuch to rukaavat yaar kam kar diijiye

Raah kee Kuch to rukaavaT yaar kam kar deejiye Aap apne ghar kee ik deevaar kam kar deejiye Aap kaa aashiq bahut kamzor dil kaa hai huzoor Dekhiye ye shiddat-e-inkaar kam kar deejiye Main bhee honTon se kahoongaa kam karen jalne kaa shauq Aap agar sargarmee-e-rukhsaar kam kar deejiye Ek to sharm aap kee aur us pe takiya darmiyaan Donon deevaaron men ik deevaar kam kar deejiye Aap to bas kholiye lab bosa dene ke liye Bosa dene par jo hai takraar kam kar deejiye Raat ke pahloo men phailaa deejiye zulf-e-daraaz Yoonhee Kuch tool-e-sab-e-beemaar kam kar deejiye Yaa idhar Kuch tez kar diije gharon kee raushnee Yaa udhar Kuch raunaq-e-baazaar kam kar deejiye Wo jo peechhe rah ga.e hain tez-raftaaree karen Aap aage hain to Kuch raftaar kam kar deejiye Haath men hai aap ke talvaar kiije qatl-e-aam Haan magar talvaar kee Kuch dhaar kam kar deejiye Bas mohabbat bas mohabbat bas mohabbat jaan-e-man Baaqee sab jazbaat kaa iz.haar kam kar deejiye Shaa.iree tanhaa.ee kee raunaq hai mahfil kee naheen 'farhat-ehsaas' apna ye darbaar kam kar deejiye