raasta de ai hujuum e shahr ghar jaaenge ham

Raasta de ai hujoom-e-shahr ghar jaa.enge ham Aur tere darmiyaan Thahre to mar jaa.enge ham Khush-khiraam aankhon men us kaa 'aks utartaa hee naheen Ab ke us ke paas le kar chashm-e-tar jaa.enge ham Wo naheen to dhuul hee mil jaa.e us ke paanv kee Us galee men ab ke ban kar rahguzar jaa.enge ham Shaayad us dahleez par rakkhaa ho ab bhee wo charaagh Vaapsee kee raah men phir us ke ghar jaa.enge ham 'umr bhar paDhte rahenge ik yahee akhbaar-e-husn Aur saare saanehon se be-khabar jaa.enge ham Jism kaa kuuza hai apna aur na ye Dariya-e-jaan Jo lagaa legaa labon se us men bhar jaa.enge ham 'ishq ne roz-e-azal hee kar diyaa thaa faisla Phir kahaan Dunya ke kahne se sudhar jaa.enge ham 'farhat-ehsaas' apne shaagirdon men shaamil kar hamen Varna is Dunya se yoonhee be-hunar jaa.enge ham