saahib e ishq ab itnii sii to raahat mujhe de
— Farhat Ehsas
Saahib-e-ishq ab itnee see to raahat mujhe de
Ghar banaa yaa dar-o-deevaar se rukhsat mujhe de
Jaan ye sarkashee-e-jism tire bas kee naheen
Meree aaghosh men aa laa ye museebat mujhe de
To faraaham na ho mujh ko ye hai marzee teree
Tujh ko jab chaahoon bulaa luun ye ijaazat mujhe de
Ye tiree bazm-e-badan yuun to naheen chal saktee
Ek shab ko hee sahee is kee nizaamat mujhe de
Aa.ine! main tiraa aa.eena-dar-aa.eena hoon
Aaj tak kaa miraa sarmaaya-e-hairat mujhe de
Na milegaa tujhe mujh saa bhee tahee-dast mureed
Mere hisse kee jo ho daulat-e-bai.at mujhe de
Jaane kab hogaa miree zaat pe aap-apna nuzool
Khvaab koee to kabhee meree bashaarat mujhe de
Mere bhee ek ishaare men ho ma.anee kaa hujoom
Aankh us kee jo kabhee dars-e-balaaghat mujhe de
'farhat-ullaah' ke khaate men na Daal aa.eene
'farhat-ehsaas' hoon main laa miree soorat mujhe de