sab neamaten hain shahr men insaan hi nahin
— Farhat Ehsas
Sab ne.amaten hain shahr men insaan hee naheen
Kuch yuun ki jaise ye koee nuqsaan hee naheen
Ik aayat-e-vajood hoon miTTee ke Dher men
Mere nuzool kee to koee shaan hee naheen
Kaabeena-e-vujood kaa main bhee hoon ik vazeer
Aisa ki meraa koee qalam-daan hee naheen
Ye jang ab kahaan ho badan men ki ruuh men
Goyaa ki ishq kaa koee maidaan hee naheen
Dast-e-junoon bhee tang huaa dasht-e-ishq men
Ab chaak kya karoon ki garebaan hee naheen
Hairaan hoon apne qatl kaa ilzaam kis ko duun
Tauheed men to shirk kaa imkaan hee naheen
'ehsaas' ne buton men khuda ko kiyaa shareek
Is shirk ke baghair to eemaan hee naheen