sahraa ke sangiin safar men aab rasaanii kam na pade

Sahraa ke sangeen safar men aab-rasaanee kam na paDe Saaree aankhen bhar kar rakhnaa dekho paanee kam na paDe Zehn musalsal qisse sochen honTh musalsal zikr karen Sub.h talak zinda rahnaa hai kaheen kahaanee kam na paDe Ishq ne saunpaa hai mujh ko ik sahraa kee ta.ameer kaa kaam Aur hidaayat kee hai zarra bhar veeraanee kam na paDe Meree shah-rag kaaTee us ne aur kahaa shokhee ke saath Too sachchaa aashiq hai to phir dekh ravaanee kam na paDe ThoDaa thoDaa martaa bhee rahtaa hoon main jiine ke saath Taaki vaqt-e-zaroorat marne kee aasaanee kam na paDe Sajda karne ko hota hoon ek bahut hee baDe but kaa Aur phir sochtaa hoon ye chhoTee see peshaanee kam na paDe Hamen chhupaane ko Dunya ne khol diye kapDon ke thaan Chaak-garebaanee ye tiraa zor-e-uryaanee kam na paDe Tum 'farhat-ehsaas' bas apne aap ko marne mat denaa Taaki daftar-e-Dunya men dakhl-e-insaanee kam na paDe