thokaren khaa ke sambhalnaa nahin aataa hai mujhe
— Farhat Ehsas
Thokaren khaa ke sanbhalnaa nahin aataa hai mujhe
Chal mire saath ki chalnaa nahin aataa hai mujhe
Apnee aankhon se bahaa de koi mere aansoo
Apnee aankhon se nikalnaa nahin aataa hai mujhe
Ab tiree garmi-e-aaghosh hee tadbeer kare
Mom ho kar bhee pighalnaa nahin aataa hai mujhe
Shaam kar deta hai aksar koi zulfon vaalaa
Varna wo din hoon ki Dhalnaa nahin aataa hai mujhe
Kitne dil tod chukaa hoon isee be-hunree se
Jaal men phans ke nikalnaa nahin aataa hai mujhe
Biich Dariya ke main Dariya to badal saktaa hoon
Apnee kashtee ko badalnaa nahin aataa hai mujhe
Apne maa'nee ko badalnaa to mujhe aataa hai
In ke lafzon ko badalnaa nahin aataa hai mujhe
'farhat-ehsaas' taraqqee nahin karnee mujh ko
Itnee raftaar se chalnaa nahin aataa hai mujhe