us ko hai ishq bataanaa bhi nahin chaahtaa hai
— Farhat Ehsas
Us ko hai ishq bataanaa bhee naheen chaahtaa hai
Aur ye baat chhupaanaa bhee naheen chaahtaa hai
Sochtaa rahtaa hai din-bhar ki miree raat men aa.e
Apne din ko ye jataanaa bhee naheen chaahtaa hai
Shaa.iree ko miraa iz.haar samajhtaa hai magar
Parda-e-sher uThaanaa bhee naheen chaahtaa hai
Saa.e ko justujoo-e-jism bahut hai phir bhee
Pahloo-e-jism men aanaa bhee naheen chaahtaa hai
Aisa lagtaa hai ki wo paa bhee chukaa hai mujh ko
Jo ba-zaahir mujhe paanaa bhee naheen chaahtaa hai
Farhat-ehsaas ko hai saaree haqeeqat ma.aloom
Mahfil-e-vahm se jaanaa bhee naheen chaahtaa hai