aaii hai kuch na puuchh qayaamat kahaan kahaan

Aa.ee hai kuch na poochh qayaamat kahaan kahaan Uf le ga.ee hai mujh ko mohabbat kahaan kahaan Betaabee-o-sukoon kee huiin manzilen tamaam Bahlaa.en tujh se chhuT ke tabee'at kahaan kahaan Furqat ho yaa visaal vahee iztiraab hai Teraa asar hai ai gham-e-furqat kahaan kahaan Har jumbish-e-nigaah men sad-kaif be-khudee Bhartee phiregee husn kee niyyat kahaan kahaan Raah-e-talab men chhoD diyaa dil kaa saath bhee Phirte liye hue ye museebat kahaan kahaan Dil ke ufuq tak ab to hain parchhaa.iyaan tiree Le jaa.e ab to dekh ye vahshat kahaan kahaan Ai nargis-e-siyaah bataa de tire nisaar Kis kis ko hai ye hosh ye ghaflat kahaan kahaan Nairang-e-ishq kee hai koi intihaa ki ye Ye gham kahaan kahaan ye masarrat kahaan kahaan Begaangee par us kee zamaane se ehtiraaz Dar-parda us adaa kee shikaayat kahaan kahaan Farq aa gaya tha daur-e-hayaat-o-mamaat men Aa.ee hai aaj yaad wo soorat kahaan kahaan Jaise fanaa baqaa men bhee koi kamee see ho Mujh ko paDee hai teree zaroorat kahaan kahaan Dunya se ai dil itnee tabee'at bharee na thee Tere liye uThaa.ee nadaamat kahaan kahaan Ab imtiyaaz-e-ishq-o-havas bhee nahin raha Hotee hai teree chashm-e-inaayat kahaan kahaan Har gaam par tareeq-e-mohabbat men maut thee Is raah men khule dar-e-rahmat kahaan kahaan Hosh-o-junoon bhee ab to bas ik baat hain 'firaaq' Hotee hai us nazar kee sharaarat kahaan kahaan