ab aksar chup chup se rahen hain yuunhii kabhuu lab kholen hain

Ab aksar chup chup se rahen hain yoonhee kabhoo lab kholen hain Pahle 'firaaq' ko dekhaa hota ab to bahut kam bolen hain Din men ham ko dekhne vaalo apne apne hain auqaat Jaao na tum in khushk aankhon par ham raaton ko ro len hain Fitrat meree 'ishq-o-mohabbat qismat meree tanhaa.ee Kahne kee naubat hee na aa.ee ham bhee kisoo ke ho len hain Khunuk siyah mahke hue saa.e phail jaa.en hain jal-thal par Kin jatanon se meree ghazlen raat kaa juuDaa kholen hain Baagh men wo khvaab-aavar 'aalam mauj-e-sabaa ke ishaaron par Daalee Daalee nauras patte sahaj sahaj jab Dolen hain Uf wo labon par mauj-e-tabassum jaise karvaTen len kaunde Haa.e wo aalam-e-jumbish-e-mizhgaan jab fitne par tolen hain Naqsh-o-nigaar-e-ghazal men jo tum ye shaadaabee paao ho Ham ashkon men kaa.enaat ke nok-e-qalam ko Dubo len hain In raaton ko hareem-e-naaz kaa ik 'aalam hue hai nadeem Khalvat men wo narm ungliyaan band-e-qabaa jab kholen hain Gham kaa fasaana sunne vaalo aakhir-e-shab aaraam karo Kal ye kahaanee phir chheDenge ham bhee zaraa ab so len hain Ham log ab to ajnabee se hain Kuch to bataao haal-e-'firaaq' Ab to tumheen ko pyaar karen hain ab to tumheen se bolen hain