ab daur e aasmaan hai na daur e hayaat hai

Ab daur-e-aasmaan hai na daur-e-hayaat hai Ai dard-e-hijr too hee bataa kitnee raat hai Har kaa.enaat se ye alag kaa.enaat hai Hairat-saraa-e-ishq men din hai na raat hai Jiinaa jo aa gaya to ajal bhee hayaat hai Aur yuun to umr-e-khizr bhee kya be-sabaat hai Kyuun intihaa-e-hosh ko kahte hain be-khudee Khursheed hee kee aakhiree manzil to raat hai Hastee ko jis ne zalzala-saamaan banaa diyaa Wo dil qaraar paa.e muqaddar kee baat hai Ye mushagaafiyaan hain giraan tab-e-ishq par Kis ko dimaagh-e-kaavish-e-zaat-o-sifaat hai ToDaa hai laa-makaan kee hadon ko bhee ishq ne Zindaan-e-aql teree to kya kaa.enaat hai Gardoon sharaar-e-barq-e-dil-e-be-qaraar dekh Jin se ye teree taaron bharee raat raat hai Gum ho ke har jagah hain za-khud raftagaan-e-ishq Un kee bhee ahl-e-kashf-o-karaamaat zaat hai Hastee ba-juz fanaa-e-musalsal ke Kuch naheen Phir kis liye ye fikr-e-qaraar-o-sabaat hai Us jaan-e-dostee kaa khuloos-e-nihaan na poochh Jis kaa sitam bhee ghairat-e-sad-iltifaat hai Yuun to hazaar dard se rote hain bad-naseeb Tum dil dukhaao vaqt-e-museebat to baat hai Unvaan ghaflaton ke hain qurbat ho yaa visaal Bas fursat-e-hayaat 'firaaq' ek raat hai