apne gam kaa mujhe kahaan gam hai

Apne gham kaa mujhe kahaan gham hai Ai ki teree khushee muqaddam hai Aag men jo paDaa wo aag huaa Husn-e-soz-e-nihaan mujassam hai Us ke shaitaan ko kahaan taufeeq 'ishq karnaa gunaah-e-aadam hai Dil ke dhaDkon men zor-e-zarb-e-kaleem Kis qadar is habaab men dam hai Hai vahee 'ishq zinda-o-jaaved Jise aab-e-hayaat bhee sam hai Is men Thahraav yaa sukoon kahaan Zindagee inqalaab-e-paiham hai Ik taDap mauj-e-tah-nasheen kee tarah Zindagee kee binaa-e-mohkam hai Rahtee Dunya men 'ishq kee Dunya Na.e 'unvaan se munazzam hai UThne vaalee hai bazm maazee kee Raushnee kam hai zindagee kam hai Ye bhee nazm-e-hayaat hai koi Zindagee zindagee kaa maatam hai Ik muamma hai zindagee ai dost Ye bhee teree adaa-e-mub.ham hai Ai mohabbat too ik azaab sahee Zindagee be tire jahannam hai Ik talaatum saa rang-o-nik.hat kaa Paikar-e-naaz men damaa-dam hai Phirne ko hai raseelee neem-nigaah Aahoo-e-naaz maa.il-e-ram hai Ruup ke jot zer-e-pairaahan Gulsitaan par ridaa-e-shabnam hai Mere siine se lag ke so jaao Palken bhaaree hain raat bhee kam hai Aah ye mehrbaaniyaan teree Shaadmaanee kee aankh pur-nam hai Narm o dosheeza kis qadar hai nigaah Har nazar daastaan-e-maryam hai Mehr-o-mah shola-haa-e-saaz-e-jamaal Jis kee jhankaar itnee maddham hai Jaise uchhle junoon kee pahlee shaam Is adaa se wo zulf barham hai Yuun bhee dil men nahin wo pahlee umang Aur teree nigaah bhee kam hai Aur kyuun chheDtee hai gardish-e-charkh Wo nazar phir ga.ee ye kya kam hai Roo-kash-e-sad-hareem-e-dil hai fazaa Wo jahaan hain 'ajeeb 'aalam hai Diye jaatee hai lau sadaa-e-'firaaq' Haan vahee soz-o-saaz kam kam hai