bahut pahle se un qadmon ki aahat jaan lete hain

Bahut pahle se un qadmon kee aahaT jaan lete hain Tujhe ai zindagee ham duur se pahchaan lete hain Miree nazren bhee aise qaatilon kaa jaan o eemaan hain Nigaahen milte hee jo jaan aur eemaan lete hain Jise kahtee hai Dunya kaamyaabee vaa.e naa-daanee Use kin qeematon par kaamyaab insaan lete hain Nigaah-e-baada-goon yuun to tiree baaton kaa kya kahnaa Tiree har baat lekin ehtiyaatan chhaan lete hain Tabee.at apnee ghabraatee hai jab sunsaan raaton men Ham aise men tiree yaadon kee chaadar taan lete hain Khud apna faisla bhee ishq men kaafee nahin hota Use bhee kaise kar guzren jo dil men Thaan lete hain Hayaat-e-ishq kaa ik ik nafas jaam-e-shahaadat hai Wo jaan-e-naaz-bardaaraan koi aasaan lete hain Ham-aahangee men bhee ik chaashnee hai ikhtilaafon kee Miree baaten ba-unvaan-e-digar wo maan lete hain Tiree maqbooliyat kee vaj.h vaahid teree ramziyyat Ki us ko maante hee kab hain jis ko jaan lete hain Ab is ko kufr maanen yaa bulandee-e-nazar jaanen Khuda-e-do-jahaan ko de ke ham insaan lete hain Jise soorat bataate hain pata detee hai seerat kaa Ibaarat dekh kar jis tarah ma.anee jaan lete hain Tujhe ghaaTaa na hone denge kaarobaar-e-ulfat men Ham apne sar tiraa ai dost har ehsaan lete hain Hamaaree har nazar tujh se na.ee saugandh khaatee hai To teree har nazar se ham nayaa paimaan lete hain Rafeeq-e-zindagee thee ab anees-e-vaqt-e-aakhir hai Tiraa ai maut ham ye doosraa ehsaan lete hain Zamaana vaardaat-e-qalb sunne ko tarastaa hai Isee se to sar aankhon par miraa deevaan lete hain 'firaaq' aksar badal kar bhes miltaa hai koi kaafir Kabhi ham jaan lete hain kabhi pahchaan lete hain