chhed ai dil ye kisi shokh ke rukhsaaron se
— Firaq Gorakhpuri
ChheD ai dil ye kisee shokh ke rukhsaaron se
Khelnaa aah dahakte hue angaaron se
Ham shab-e-hijr men jab sotee hai saaree Dunya
Zikr karte hain tiraa chhiTke hue taaron se
Ashk bhar laa.e kisee ne jo tiraa naam liyaa
Aur kya hijr men hota tire beemaaron se
ChheD naghma koi go dil kee shikasta hain ragen
Ham nikaalenge sadaa TuuTe hue taaron se
Ham ko teree hai zaroorat na ise bhuul ai dost
Tere iqraaron se matlab hai na inkaaron se
Ham hain wo bekas-o-be-yaar ki baiThe baiThe
Apna dukh-dard kahaa karte hain deevaaron se
Ahl-e-Dunya se ye kahte hain mire naala-e-dil
Ham sadaa denge gham-e-hijr ke meenaaron se
Ishq hamdardee-e-aalam kaa ravaadaar nahin
Ho ga.ee bhuul 'firaaq' aap ke gham-khvaaron se