dete hain jaam e shahaadat mujhe maaluum na thaa

Dete hain jaam-e-shahaadat mujhe maa'loom na thaa Hai ye aa.een-e-mohabbat mujhe maa'loom na thaa Matlab-e-chashm-e-muravvat mujhe maa'loom na thaa Tujh ko mujh se thee shikaayat mujhe maa'loom na thaa Chashm-e-khaamosh kee baabat mujhe maa'loom na thaa Ye bhee hai harf-o-hikaayat mujhe maa'loom na thaa 'ishq bas men hai mashiyyat ke aqeeda thaa miraa Us ke bas men hai mashiyyat mujhe maa'loom na thaa Haft-khvaan jis ne kiye tai sar-e-raah-e-tasleem Toot jaatee hai wo himmat mujhe maa'loom na thaa Aaj har qatra-e-mai ban gaya ik chingaaree Thee ye saaqee kee sharaarat mujhe maa'loom na thaa Nigah-e-mast ne talvaar uThaa lee sar-e-bazm Yuun badal jaatee hai niyyat mujhe maa'loom na thaa Gham-e-hastee se jo bezaar raha main ik 'umr Tujh se bhee thee use nisbat mujhe maa'loom na thaa 'ishq bhee ahl-e-tareeqat men hai aisa thaa khayaal 'ishq hai peer-e-tareeqat mujhe maa'loom na thaa Poochh mat sharh-e-karam-haa-e-azeezaan hamdam Un men itnee thee sharaafat mujhe maa'loom na thaa Jab se dekhaa hai tujhe mujh se hai meree an-ban Husn kaa rang-e-siyaasat mujhe maa'loom na thaa Shakl insaan kee ho chaal bhee insaan kee ho Yuun bhee aatee hai qayaamat mujhe maa'loom na thaa Sar-e-maamoora-e-aalam ye dil-e-khaana-kharaab MiT gaya teree badaulat mujhe maa'loom na thaa Parda-e-arz-e-wafa men bhee raha hoon kartaa Tujh se main apnee hee gheebat mujhe maa'loom na thaa Naqd-e-jaan kya hai zamaane men mohabbat hamdam Naheen miltee kisee qeemat mujhe maa'loom na thaa Ho gaya aaj rafeeqon se gale mil ke judaa Apna khud ishq-e-sadaaqat mujhe maa'loom na thaa Dard dil kya hai khulaa aaj tire laDne par Tujh se itnee thee mohabbat mujhe maa'loom na thaa Dam nikal jaa.e magar dil na lagaa.e koee 'ishq kee ye thee vasiyyat mujhe maa'loom na thaa Husn vaalon ko bahut sahl samajh rakkhaa thaa Tujh pe aa.egee tabee'at mujhe maa'loom na thaa Kitnee khallaaq hai ye neestee-e-ishq 'firaaq' Us se hastee hai 'ibaarat mujhe maa'loom na thaa