firaaq ik naii suurat nikal to saktii hai

'firaaq' ik na.ee soorat nikal to saktee hai Ba-qaul us aankh ke duniyaa badal to saktee hai Tire khayaal ko kuchh chup see lag ga.ee varna Kahaaniyon se shab-e-gham bahal to saktee hai Uroos-e-dahr chale khaa ke Thokaren lekin Qadam qadam pe javaanee ubal to saktee hai PalaT paDe na kaheen us nigaah kaa jaadoo Ki Doob kar ye chhuree kuchh uchhal to saktee hai Bujhe hue nahin itne bujhe hue dil bhee Fasurdagee men tabee.at machal to saktee hai Agar too chaahe to gham vaale shaadmaan ho jaa.en Nigaah-e-yaar ye hasrat nikal to saktee hai Ab itnee band nahin gham-kadon kee bhee raahen Havaa-e-koocha-e-mahboob chal to saktee hai KaDe hain kos bahut manzil-e-mohabbat ke Mile na chhaanv magar dhoop Dhal to saktee hai Hayaat lau tah-e-daamaan-e-marg de uTThee Havaa kee raah men ye sham.a jal to saktee hai Kuchh aur maslahat-e-jazb-e-ishq hai varna Kisee se chhuT ke tabee.at sambhal to saktee hai Azal se soee hai taqdeer-e-ishq maut kee niind Agar jagaa.iye karvaT badal to saktee hai Gham-e-zamaana-o-soz-e-nihaan kee aanch to de Agar na TuuTe ye zanjeer gal to saktee hai Shareek-e-sharm-o-hayaa kuchh hai bad-gumaanee-e-husn Nazar uThaa ye jhijak see nikal to saktee hai Kabhi wo mil na sakegee main ye nahin kahtaa Wo aankh aankh men paD kar badal to saktee hai Badaltaa jaa.e gham-e-rozgaar kaa markaz Ye chaal gardish-e-ayyaam chal to saktee hai Wo be-niyaaz sahee dil mataa-e-hech sahee Magar kisee kee javaanee machal to saktee hai Tiree nigaah sahaaraa na de to baat hai aur Ki girte girte bhee duniyaa sambhal to saktee hai Ye zor-o-shor salaamat tiree javaanee bhee Ba-qaul ishq ke saanche men Dhal to saktee hai Sunaa hai barf ke TukDe hain dil haseenon ke Kuchh aanch paa ke ye chaandee pighal to saktee hai Hansee hansee men lahoo thookte hain dil vaale Ye sar-zameen magar la.al ugal to saktee hai Jo too ne tark-e-mohabbat ko ahl-e-dil se kahaa Hazaar narm ho ye baat khal to saktee hai Are wo maut ho yaa zindagee mohabbat par Na kuchh sahee kaf-e-afsos mal to saktee hai Hain jis ke bal pe khaDe sarkashon ko wo dhartee Agar kuchal nahin saktee nigal to saktee hai Huee hai garm lahu pee ke ishq kee talvaar Yuun hee jilaa.e jaa ye shaakh phal to saktee hai Guzar rahee hai dabe paanv ishq kee devee Subuk-ravee se jahaan ko masal to saktee hai Hayaat se nigah-e-vaapseen hai kuchh maanoos Mire khayaal se aankhon men pal to saktee hai Na bhoolnaa ye hai taakheer husn kee taakheer 'firaaq' aa.ee huee maut Tal to saktee hai