haath aae to vahii daaman e jaanaan ho jaae

Haath aa.e to vahee daaman-e-jaanaan ho jaa.e ChhooT jaa.e to vahee apna garebaan ho jaa.e Ishq ab bhee hai wo mahram-e-be-gaana-numaa Husn yuun laakh chhupe laakh numaayaan ho jaa.e Hosh-o-ghaflat se bahut duur hai kaifiyyat-e-ishq Us kee har be-khabaree manzil-e-irfaan ho jaa.e Yaad aatee hai jab apnee to taDap jaataa hoon Meree hastee tiraa bhoolaa havaa paimaan ho jaa.e Aankh wo hai jo tiree jalva-gah-e-naaz bane Dil vahee hai jo saraapaa tiraa armaan ho jaa.e Paak-baazaan-e-mohabbat men jo bebaakee hai Husn gar us ko samajh le to pashemaan ho jaa.e Sahl ho kar hui dushvaar mohabbat teree Use mushkil jo banaa len to Kuch aasaan ho jaa.e Ishq phir ishq hai jis ruup men jis bhes men ho Ishrat-e-vasl bane yaa gham-e-hijraan ho jaa.e Kuch mudaavaa bhee ho majrooh dilon kaa ai dost Marham-e-zakhm tiraa jaur-pashemaan ho jaa.e Ye bhee sach hai koi ulfat men pareshaan kyuun ho Ye bhee sach hai koi kyoonkar na pareshaan ho jaa.e Ishq ko arz-e-tamannaa men bhee laakhon pas-o-pesh Husn ke vaaste inkaar bhee aasaan ho jaa.e Jhilmilaatee hai sar-e-bazm-e-jahaan sham-e-khudee Jo ye bujh jaa.e charaagh-e-rah-e-irfaan ho jaa.e Sar-e-shoreeda diyaa dasht-o-bayaabaan bhee diye Ye miree khoobee-e-qismat ki wo zindaan ho jaa.e Uqda-e-ishq ajab uqda-e-mohmal hai 'firaaq' Kabhi laa-hal kabhi mushkil kabhi aasaan ho jaa.e