hindolaa

Dayaar-e-hind tha gahvaara yaad hai hamdam Bahut zamaana huaa kis ke kis ke bachpan kaa Isee zameen pe khelaa hai 'raam' kaa bachpan Isee zameen pe un nanhe nanhe haathon ne Kisee samay men dhanush-baan ko sambhaalaa tha Isee dayaar ne dekhee hai 'krishn' kee liilaa Yaheen gharondon men siitaa sulochanaa raadhaa Kisee zamaane men guDiyon se kheltee hongee Yahee zameen yahee Dariya pahaaD jangal baagh Yahee havaa.en yahee sub.h-o-shaam suraj chaand Yahee ghaTaa.en yahee barq-o-ra.ad o qaus-e-quzah Yaheen ke giit rivaayaat mausamon ke juloos Huaa zamaana ki 'siddhaarth' ke the gahvaare Inhee nazaaron men bachpan kaTaa tha 'vikram' kaa Sunaa hai 'bhartarharee' bhee inheen se khelaa tha 'bharat' agastya' 'kapil' 'vyaas' 'pashee' 'kautilya' 'janak' vashishth' 'manu' 'vaalmik' vishvaamitr 'kanaad' 'gautam' o ramanuj 'kumaaril-bhatt' MohanjoDaaro haDappaa ke aur ajantaa ke Banaane vaale yaheen ballamon se khele the Isee hinDole men 'bhavabhut' o 'kaaleedaas' kabhi Humak humak ke jo tutlaa ke gungunaa.e the Sarasvatee ne zabaanon ko un kee choomaa tha Yaheen ke chaand va suraj khilaune the un ke Inheen fazaaon men bachpan palaa tha 'khusrav' kaa Isee zameen se uThe 'tansen' aur 'akbar' 'raheem' 'nanak' o 'chaitanya' aur 'chishti' ne Inheen fazaaon men bachpan ke din guzaare the Isee zameen pe kabhi shazaada-e-'khurram' Zaraa see dil-shikanee par jo ro diyaa hogaa Bhar aayaa tha dil-e-naazuk to kya ajab is men In aansuon men jhalak taaj kee bhee dekhee ho 'ahalyabaa.i' 'daman' 'padmini' o 'raziya' ne Yaheen ke peDon kee shaakhon men Daale the jhoole Isee fazaa men baDhaa.ee thee peng bachpan kee Inhee nazaaron men saavan ke giit gaa.e the Isee zameen pe ghuTnon ke bal chale honge 'malik-mohammad' o 'raskhan' aur 'tulsi-das' Inheen fazaaon men goonjee thee totlee bolee 'kabir-das' 'Tukaaraam' 'soor' o 'meeraa' kee Isee hinDole men 'viddypati' kaa kanTh khulaa Isee zameen ke the laal 'meer' o 'ghaalib' bhee Thumak Thumak ke chale the gharon ke aangan men 'anees' o 'haalee' o 'iqbaal' aur 'vaaris-shaah' Yaheen kee khaak se ubhre the 'premchand' o 'tagore' Yaheen se uTThe the tahzeeb-e-hind ke me.amaar Isee zameen ne dekhaa tha baal-pan in kaa Yaheen dikhaa.ee thiin in sab ne baal-leelaa.en Yaheen har ek ke bachpan ne tarbiyat paa.ee Yaheen har ek ke jeevan kaa baalkaanD khulaa Yaheen se uThte bagoolon ke saath dauDe hain Yaheen kee mast ghaTaaon ke saath jhoome hain Yaheen kee madh-bharee barsaat men nahaa.e hain LipaT ke keechaD o paanee se bachpane un ke Isee zameen se uTThe wo desh ke saavant UDaa diyaa tha jinhen company ne topon se Isee zameen se uThee hain an-ginat naslen Pale hain hind hinDole men an-ginat bachche Mujh aise kitne hee gumnaam bachche khele hain Isee zameen se isee men supurd-e-khaak hue Zameen-e-hind ab aaraam-gaah hai un kee Is arz-e-paak se uTTheen bahut see tahzeeben Yaheen tuloo huiin aur yaheen ghuroob huiin Isee zameen se ubhre ka.ee uloom-o-funoon Faraaz-e-koh-e-himaala ye daur-e-gang-o-jaman Aur in kee god men parvarda kaarvaanon ne Yaheen rumooz-e-khiraam-e-sukoon-numaa seekhe Naseem-e-sub.h-e-tamaddun ne bhairveen chheDee Yaheen vatan ke taraanon kee wo paven phooTen Vo be-qaraar sukoon-zaa tarannum-e-saharee Vo kapkapaate hue soz-o-saaz ke sho.ale Inhee fazaaon men angDaa.iyaan jo le ke uThe Lavon se jin ke charaaghaan huee thee bazm-e-hayaat Jinhon ne hind kee tahzeeb ko zamaana huaa Bahut se zaaviyon se aa.eena dikhaayaa tha Isee zameen pe Dhalee hai miree hayaat kee shaam Isee zameen pe wo sub.h muskuraa.ee hai Tamaam sho.ala o shabnam miree hayaat kee sub.h Sunaa.oon aaj kahaanee main apne bachpan kee Dil-o-dimaagh kee kaliyaan abhee na chaTkee thiin Hamesha kheltaa rahtaa tha bhaa.ee bahnon men Hamaare saath mohalle kee laDkiyaan laDke Machaa.e rakhte the baalak udham har ek ghaDee Lahoo tarang uchhal-phaand kaa ye aalam tha Mohalla sar pe uThaa.e phire jidhar guzre Hamaare chahchahe aur shor goonjte rahte Chahaar-samt mohalle ke goshe goshe men Fazaa men aaj bhee laa-raib goonjte honge Agarche doosre bachchon kee tarah tha main bhee Ba-zaahir auron ke bachpan saa tha miraa bachpan Ye sab sahee mire bachpan kee shakhsiyat bhee thee ek Vo shakhsiyat ki bahut shokh jis ke the khad-o-khaal Adaa adaa men koi shaan-e-infiraadee thee Gharaz kuch aur hee lachchhan the mere bachpan ke Mujhe tha chhoTe baDon se bahut shadeed lagaav Har ek par main chhiDaktaa tha apnee nannhee see jaan Dil umDaa aataa tha aisa ki jee ye chaahtaa tha UThaa ke rakh luun kaleje men apnee dunya ko Mujhe hai yaad abhee tak ki khel-kood men bhee Kuchh aise vaqfe pur-asraar aa hee jaate the Ki jin men sochne lagtaa tha kuch miraa bachpan Ka.ee ma.aanee-e-be-lafz chhoone lagte the Butoon-e-ghaib se mere shu.oor-e-asghar ko Har ek manzar-e-maanoos ghar kaa har gosha Kisee tarah kee ho ghar men sajee huee har chiiz Mire mohalle kee galiyaan makaan dar-o-deevaar Chabootre kuen kuch peD jhaaDiyaan belen Vo pheree vaale ka.ee un ke bhaant bhaant ke bol Vo jaane boojhe manaazir wo aasmaan o zameen Badalte waqt kaa aa.eena garmee-o-khunkee Ghuroob-e-mahr men rangon kaa jaagtaa jaadoo Shafaq ke sheesh-mahal men gudaaz-e-pinhaan se Javaahron kee chaTaanen see kuch pighaltee huiin Shajar hajar kee wo kuch sochtee huee dunya Suhaanee raat kee maanoos ramaziyat kaa fusoon Alassabaah ufuq kee wo thartharaatee bhaven Kisee kaa jhaanknaa aahista phooTtee pau se Vo dopahar kaa samay darja-e-tapish kaa chaDhaav Thakee thakee see fazaa men wo zindagee kaa utaar Huaa kee bansiyaan bansvaaDiyon men bajtee huiin Vo din ke baDhte hue saa.e sah-pahar kaa sukoon Sukoot shaam kaa jab donon waqt milte hain Gharaz jhalakte hue sarsaree manaazir par Mujhe gumaan paristaaniyat kaa hota tha Har ek chiiz kee wo khvaab-naak asliyyat Mire shu.oor kee chilman se jhaanktaa tha koi Liye ruboobiyat-e-kaa.enaat kaa ehsaas Har ek jalve men ghaib o shuhood kaa wo milaap Har ik nazaara ik aa.eena-khaana-e-hairat Har ek manzar-e-maanoos ek hairat-zaar Kaheen rahoon kaheen khelon kaheen paDhoon likhoon Mire shu.oor pe manDlaate the manaazir-e-dahr Main akasr un ke tasavvur men Doob jaataa tha Vafoor-e-jazba se ho jaatee thee mizha pur-nam Mujhe yaqeen hai in unsuree manaazir se Ki aam bachchon se letaa tha main ziyaada asar Kisee samay miree tiflee rahi na be-parvaa Na chhoo sakee miree tiflee ko ghaflat-e-tiflee Ye khel-kood ke lamhon men hota tha ehsaas Duaa.en deta ho jaise mujhe sukoot-e-davaam Ki jaise haath abad rakh de dosh-e-tiflee par Har ek lamha ke rakhnon se jhaanktee sadiyaan Kahaaniyaan jo sunoon un men Doob jaataa tha Ki aadmee ke liye aadmee kee jag-beetee Se baDh ke kaun see shai aur ho hee saktee hai Inhee fasaanon men pinhaan the zindagee ke rumooz Inhee fasaanon men khulte the raaz-haa-e-hayaat Unhen fasaanon men miltee thiin ziist kee qadren Rumooz-e-besh-bahaa TheTh aadmiyat ke Kahaaniyaan thiin ki sad-dars-gaah-e-riqqat-e-qalb Har ik kahaanee men shaa.istagi-e-gham kaa sabaq Vo unsur aansuon kaa daastaan-e-insaan men Vo nal-daman kee kathaa sarguzasht-e-savitree 'shakuntlaa' kee kahaanee 'bharat' kee qurbaanee Vo marg-e-bhishm-pitaamah wo sej teeron kee Vo paan.cho paanDav kee sovarg-yaatraa kee kathaa Vatan se rukhsat-e-'siddhaarth' 'raam' kaa ban-baas Vafaa ke ba.ad bhee 'seetaa' kee wo jalaa-vatanee Vo raaton-raat 'siree-krishn' ko uThaa.e hue Balaa kee qaid se 'basdev' kaa nikal jaanaa Vo andhkaar wo baarish, baDhee huee jamunaa Gham-e-aafreen kahaanee wo 'heer' 'raanjhaa' kee Shu.oor-e-hind ke bachpan kee yaadgaar-e-azeem Ki aise vaise takhayyul kee saans ukhaD jaa.e Ka.ee muhayyur-e-idraak dev-maalaayen Hitopdesh ke qisse kathaa sarat-saagar KaroDon seenon men wo goonjtaa huaa aalhaa Main poochhtaa hoon kisee aur malak vaalon se Kahaaniyon kee ye daulat ye be-bahaa daulat Fasaane dekh lo in ke nazar bhee aatee hai Main poochhtaa hoon ki gahvaare aur qaumon ke Base hue hain kaheen aisi daastaanon se Kahaaniyaan jo main suntaa tha apne bachpan men Mire liye wo na thiin mahz baa.is-e-tafreeh Fasaanon se mire bachpan ne sochnaa seekhaa Fasaanon se mujhe sanjeedgee ke dars mile Fasaanon men nazar aatee thee mujh ko ye dunya Gham o khushee men rachee pyaar men basaa.ee huee Fasaanon se mire dil ne ghulaavaTen paa.een Yahee nahin ki mashaaheer hee ke afsaane Zaraa see umr men karte hon mujh ko muta.assir Mohalle Tole ke gumnaam aadamiyyon ke Kuchh aise sunne men aate the vaaqi.aat-e-hayaat Jon yuun to hote the farsooda aur ma.amoolee Magar the aa.eene ikhlaas aur sharaafat ke Ye chand aa.ee ga.ee baaten aisi baaten thiin Ki jin kee oT chamaktaa tha dard-e-insaanee Ye vaardaat nahin razmiyye hayaat ke the Gharaz ki ye hain mire bachpane kee tasveeren Nadeem aur bhee kuch khatt-o-khaal hain un ke Ye meree maan kaa hai kahnaa ki jab main bachcha tha Main aise aadmee kee god men na jaataa tha Jo bad-qimaar ho aibee ho yaa ho bad-soorat Mujhe bhee yaad hai nau das baras hee kaa main tha To mujh pe kartaa tha jaadoo saa husn-e-insaanee Kuchh aisa hota tha mahsoos jab main dekhtaa tha Shagufta rang tar-o-taaza ruup vaalon kaa Ki un kee aanch miree haDDiyaan galaa degee Ik aazmaa.ish-e-jaan thee ki tha shu.oor-e-jamaal Aur us kee nashtariyyat us kee ustukhaan-sozee Gham o nashaat lagaavaT mohabbat o nafrat Ik intishaar-e-sakoon iztiraab pyaar itaab Vo be-panaah zakee-ul-hisee wo hilm o ghuroor Kabhee kabhi wo bhare ghar men hiss-e-tanhaa.ee Vo vahshaten miree maahaul-e-khush-gavaar men bhee Miree sarisht men ziddain ke ka.ee joDe Shurooa hee se the maujood aab-o-taab ke saath Mire mizaaj men pinhaan thee ek jadaliyyat Ragon men chhooTte rahte the be-shumaar anaar Nadeem ye hain mire baal-pan ke kuch aasaar Vafoor o shiddat-e-jazbaat kaa ye aalam tha Ki kaunde jast karen dil ke aabgeene men Vo bachpanaa jise bardaasht apnee mushkil ho Vo bachpanaa jo khud apnee hee tevriyaan see chaDhaa.e Nadeem zikr-e-javaanee se kaanp jaataa hoon Javaanee aa.ee dabe paanv aur yuun aa.ee Ki us ke aate hee bigDaa banaa-banaayaa khel Vo khvaahishaat ke jazbaat ke umaDte hue Vo honkte hue be-naam aag ke toofaan Vo phooTtaa huaa jvaalaa-mukhee javaanee kaa Ragon men uThtee huee aandhiyon ke wo jhaTke Ki jo tavaazun-e-hastee jhinjhoD ke rakh den Vo zalzale ki pahaaDon ke pair ukhaD jaa.en Bulooghiyat kee wo Teesen wo karb-e-nashv-o-numaa Aur aise men mujhe byaahaa gaya bhalaa kis se Jo ho na saktee thee hargiz miree shareek-e-hayaat Ham ek doosre ke vaaste bane hee na the Siyaah ho ga.ee dunya miree nigaahon men Vo jis ko kahte hain shaadee-e-khaanaa-aabaadee Mire liye wo banee bevgee javaanee kee LuTaa suhaag miree zindagee kaa maanDo men Nadeem khaa ga.ee mujh ko nazar javaanee kee Balaa-e-jaan mujhe ho gaya shu.oor-e-jamaal Talaash-e-shola-e-ulfat se ye huaa haasil Ki nafraton kaa agan-kunD ban ga.ee hastee Vo halq o siina o rag rag men be-panaah chubhaa Nadeem jaise nigal lee ho main ne naag-phanee Z ishq-zaadam o ishqam kamusht zaar-o-daregh Khabar na burd ba-rustam kase ki sohraabam Na poochh aalam-e-kaam-o-dahan nadeem mire Samar hayaat kaa jab raakh bin gaya munh men Main chaltee-phirtee chitaa ban gaya javaanee kee Main kaandhaa deta raha apne jiite murde ko Ye sochtaa tha ki ab kya karoon kahaan jaaon Bahut se aur masaa.ib bhee mujh pe Toot paDe Main DhoonDhne lagaa har samt sachchee jhooTee panaah Talaash-e-husn men sher-o-adab men dostee men Rundhee sadaa se mohabbat kee bhiik maangee hai Na.e sire se samajhnaa paDaa hai dunya ko BaDe jatan se sambhaalaa hai khud ko main ne nadeem Mujhe sambhalne men to chaalees saal guzre hain Meree hayaat to vish-paan kee kathaa hai nadeem Main zahr pee ke zamaane ko de sakaa amrit Na poochh main ne jo zahraaba-e-hayaat piyaa Magar hoon dil se main is ke liye sipaas-guzaar Larazte haathon se daaman khuloos kaa na chhaTaa Bachaa ke rakkhee thee main ne amaanat-e-tiflee Ise na chheen sakee mujh se dast-burd-e-shabaab Ba-qaul shaa.er-e-mulk-e-farang har bachcha Khud apne ahd-e-javaanee kaa baap hota hai Ye kam nahin hai ki tiflee-e-rafta chhoD ga.ee Dil-e-hazeen men ka.ee chhoTe chhoTe naqsh-e-qadam Miree anaa kee ragon men paDe hue hain abhee Na jaane kitne bahut narm ungliyon ke nishaan Hanooz waqt ke be-dard haath kar na sake Hayaat-e-rafta kee zinda nishaaniyon ko fanaa Zamaana chheen sakegaa na meree fitrat se Miree safaa mire tahtush-shu.oor kee ismat Takhaiyyulaat kee dosheezgee kaa radd-e-amal Javaan ho ke bhee be-laus tifl-vash jazbaat Syaanaa hone pe bhee ye jibillaten meree Ye sarkhushee o gham be-riyaa ye qalb-gudaaz Baghair bair ke an-ban gharaz se paak tapaak Gharaz se paak ye aansoo gharaz se paak hansee Ye dasht-e-dahr men hamdardiyon kaa sar-chashma Qubooliyat kaa ye jazba ye kaa.enaat o hayaat Is arz-e-paak par eemaan ye ham-aahangee Har aadmee se har ik khvaab o ziist se ye lagaav Ye maan kee god kaa ehsaas sab manaazir men Qareeb o duur zameen men ye boo-e-vataniyyat Nizaam-e-shams-o-qamar men payaam-e-hifz-e-hayaat Ba-chashm-e-shaam-o-sahar maamtaa kee shabnam see Ye saaz o dil men mire naghma-e-analkaunain Har iztiraab men rooh-e-sukoon-e-be-paayaan Zamaana-e-guzaraan men davaam kaa sargam Ye bazm-e-jashn-e-hayaat-o-mamaat sajtee huee Kisee kee yaad kee shahnaa.iyaan see bajtee huee Ye ramazeeyat ke anaasir shu.oor-e-pukhta men Falak pe vajd men laatee hai jo farishton ko Vo shaa.eree bhee buloogh-e-mizaaj-e-tiflee hai Ye nashtariyyat-e-hastee ye is kee sheriyat Ye pattee pattee pe gulzaar-e-zindagee ke kisee Lateef nuur kee parchhaa.iyaan see paDtee huee Baham ye hairat o maanoosiyat kee sargoshee Bashar kee zaat ki mahr-e-uloohiyat ba-jabeen Abad ke dil men jaDen maartaa huaa sabza Gham-e-jahaan mujhe aankhen dikhaa nahin saktaa Ki aankhen dekhe hue hoon main ne apne bachpan kee Mire lahoo men abhee tak sunaa.ee detee hain Sukoot-e-huzn men bhee ghunghruon kee jhankaaren Ye aur baat ki main is pe kaan de na sakoon Isee vadee.at-e-tiflee kaa ab sahaaraa hai Yahee hain marham-e-kaafoor dil ke zakhmon par Unhee ko rakhnaa hai mahfooz taa-dam-e-aakhir Zameen-e-hind hai gahvaara aaj bhee hamdam Agar hisaab karen das karoD bachchon kaa Ye bachche hind kee sab se baDee amaanat hain Har ek bachche men hain sad-jahaan-e-imkaanaat Magar vatan kaa hal-o-aqd jin ke haath men hai Nizaam-e-zindagee-e-hind jin ke bas men hai Ravayya dekh ke un kaa ye kahnaa paDtaa hai Kise paDee hai ki samjhe wo is amaanat ko Kise paDee hai ki bachchon kee zindagee ko bachaa.e Kharaab hone se Talne se suukh jaane se Bachaa.e kaun in aazurda honhaaron ko Vo zindagee jise ye de rahe hain bhaarat ko KaroDon bachchon ke miTne kaa ik alamiyya hai Churaa.e jaate hain bachche abhee gharon se yahaan Ki jism tod diye jaa.en un ke taaki mile Churaane vaalon ko khairaat maagh-mele kee Jo is azaab se bach jaa.en to gale paD jaa.en Vo la.anten ki hamaare karoDon bachchon kee Nadeem khair se miTTee kharaab ho jaa.e Vo muflisee ki khushee chheen le wo be-bargee Udaasiyon se bharee zindagee kee be-rangee Vo yaasiyaat na jis ko chhue shuaa-e-umeed Vo aankhen dekhtee hain har taraf jo be-nooree Vo TukTukee ki jo pathraa ke rah ga.ee ho nadeem Vo be-dilee kee hansee chheen le jo honTon se Vo dukh ki jis se sitaaron kee aankh bhar aa.e Vo gandagee wo kasaafat maraz-zada paikar Vo bachche chhin ga.e hon jin se bachpane un ke Hameen ne ghonT diyaa jis ke bachpane kaa galaa Jo khaate-peete gharon ke hain bachche un ko bhee kya Samaaj phoolne-phalne ke de sakaa saadhan Vo saans lete hain tahzeeb-kush fazaaon men Ham un ko dete hain be-jaan aur ghalat ta.aleem Milegaa ilm-e-jihaalat-numaa se kya un ko Nikal ke madrason aur universitiyyon se Ye bad-naseeb na ghar ke na ghaaT ke honge Main poochhtaa hoon ye ta.aleem hai ki makkaaree KaroDon zindagiyon se ye be-panaah daghaa Nisaab aisa ki mehnat karen agar is par Bajaa.e ilm jahaalat kaa iktisaab karen Ye ulTaa dars-e-adab ye saDee huee ta.aleem Dimaagh kee ho ghizaa yaa ghizaa-e-jismaanee Har ik tarah kee ghizaa men yahaan milaavaT hai Vo jis ko bachchon kee ta.aleem kah ke dete hain Vo dars ulTee chhuree hai gale pe bachpan ke Zameen-e-hind hinDolaa nahin hai bachchon kaa KaroDon bachchon kaa ye des ab janaaza hai Ham inqalaab ke khatron se khuub vaaqif hain Kuchh aur roz yahee rah ga.e jo lail-o-nahaar To mol lenaa paDegaa hamen ye khatra bhee Ki bachche qaum kee sab se baDee amaanat hain Dayar-e-hind tha gahwara yaad hai hamdam Bahut zamana hua kis ke kis ke bachpan ka Isi zamin pe khela hai 'ram' ka bachpan Isi zamin pe un nanhe nanhe hathon ne Kisi samay mein dhanush-ban ko sambhaala tha Isi dayar ne dekhi hai 'krishn' ki lila Yahin gharondon mein sita sulochana radha Kisi zamane mein guDiyon se khelti hongi Yahi zamin yahi dariya pahaD jangal bagh Yahi hawaen yahi subh-o-sham suraj chand Yahi ghaTaen yahi barq-o-rad o qaus-e-quzah Yahin ke git riwayat mausamon ke julus Hua zamana ki 'siddhaarth' ke the gahware Inhi nazaron mein bachpan kaTa tha 'wikram' ka Suna hai 'bhartarhari' bhi inhin se khela tha 'bharat' agastya' 'kapil' 'wyas' 'pashi' 'kautilya' 'janak' washishth' 'manu' 'walmik' wishwamitr 'kanad' 'gautam' o ramanuj 'kumaril-bhatt' MohanjoDaro haDappa ke aur ajanta ke Banane wale yahin ballamon se khele the Isi hinDole mein 'bhawabhut' o 'kalidas' kabhi Humak humak ke jo tutla ke gungunae the Saraswati ne zabanon ko un ki chuma tha Yahin ke chand wa suraj khilaune the un ke Inhin fazaon mein bachpan pala tha 'KHusraw' ka Isi zamin se uThe 'tansen' aur 'akbar' 'rahim' 'nanak' o 'chaitanya' aur 'chishti' ne Inhin fazaon mein bachpan ke din guzare the Isi zamin pe kabhi shazada-e-'KHurram' Zara si dil-shikani par jo ro diya hoga Bhar aaya tha dil-e-nazuk to kya ajab is mein In aansuon mein jhalak taj ki bhi dekhi ho 'ahalyabai' 'daman' 'padmini' o 'raziya' ne Yahin ke peDon ki shaKHon mein Dale the jhule Isi faza mein baDhai thi peng bachpan ki Inhi nazaron mein sawan ke git gae the Isi zamin pe ghuTnon ke bal chale honge 'malik-mohammad' o 'raskhan' aur 'tulsi-das' Inhin fazaon mein gunji thi totli boli 'kabir-das' 'Tukaram' 'sur' o 'mira' ki Isi hinDole mein 'widdypati' ka kanTh khula Isi zamin ke the lal 'mir' o 'ghaalib' bhi Thumak Thumak ke chale the gharon ke aangan mein 'anis' o 'haali' o 'iqbaal' aur 'waris-shah' Yahin ki KHak se ubhre the 'premchand' o 'tagore' Yahin se uTThe the tahzib-e-hind ke meamar Isi zamin ne dekha tha baal-pan in ka Yahin dikhai thin in sab ne baal-lilaen Yahin har ek ke bachpan ne tarbiyat pai Yahin har ek ke jiwan ka baalkanD khula Yahin se uThte bagulon ke sath dauDe hain Yahin ki mast ghaTaon ke sath jhume hain Yahin ki madh-bhari barsat mein nahae hain LipaT ke kichaD o pani se bachpane un ke Isi zamin se uTThe wo desh ke sawant UDa diya tha jinhen company ne topon se Isi zamin se uThi hain an-ginat naslen Pale hain hind hinDole mein an-ginat bachche Mujh aise kitne hi gumnam bachche khele hain Isi zamin se isi mein supurd-e-KHak hue Zamin-e-hind ab aaram-gah hai un ki Is arz-e-pak se uTThin bahut si tahziben Yahin tulu huin aur yahin ghurub huin Isi zamin se ubhre kai ulum-o-funun Faraaz-e-koh-e-himala ye daur-e-gang-o-jaman Aur in ki god mein parwarda karwanon ne Yahin rumuz-e-KHiram-e-sukun-numa sikhe Nasim-e-subh-e-tamaddun ne bhairwin chheDi Yahin watan ke taranon ki wo pawen phuTen Wo be-qarar sukun-za tarannum-e-sahari Wo kapkapate hue soz-o-saz ke shoale Inhi fazaon mein angDaiyan jo le ke uThe Lawon se jin ke charaghan hui thi bazm-e-hayat Jinhon ne hind ki tahzib ko zamana hua Bahut se zawiyon se aaina dikhaya tha Isi zamin pe Dhali hai meri hayat ki sham Isi zamin pe wo subh muskurai hai Tamam shoala o shabnam meri hayat ki subh Sunaun aaj kahani main apne bachpan ki Dil-o-dimagh ki kaliyan abhi na chaTki thin Hamesha khelta rehta tha bhai bahnon mein Hamare sath mohalle ki laDkiyan laDke Machae rakhte the baalak udham har ek ghaDi Lahu tarang uchhal-phand ka ye aalam tha Mohalla sar pe uThae phire jidhar guzre Hamare chahchahe aur shor gunjte rahte Chahaar-samt mohalle ke goshe goshe mein Faza mein aaj bhi la-raib gunjte honge Agarche dusre bachchon ki tarah tha main bhi Ba-zahir auron ke bachpan sa tha mera bachpan Ye sab sahi mere bachpan ki shaKHsiyat bhi thi ek Wo shaKHsiyat ki bahut shoKH jis ke the KHad-o-KHal Ada ada mein koi shan-e-infiradi thi Gharaz kuch aur hi lachchhan the mere bachpan ke Mujhe tha chhoTe baDon se bahut shadid lagaw Har ek par main chhiDakta tha apni nannhi si jaan Dil umDa aata tha aisa ki ji ye chahta tha UTha ke rakh lun kaleje mein apni duniya ko Mujhe hai yaad abhi tak ki khel-kud mein bhi Kuchh aise waqfe pur-asrar aa hi jate the Ki jin mein sochne lagta tha kuch mera bachpan Kai maani-e-be-lafz chhune lagte the Butun-e-ghaib se mere shuur-e-asghar ko Har ek manzar-e-manus ghar ka har gosha Kisi tarah ki ho ghar mein saji hui har chiz Mere mohalle ki galiyan makan dar-o-diwar Chabutre kuen kuch peD jhaDiyan belen Wo pheri wale kai un ke bhant bhant ke bol Wo jaane bujhe manazir wo aasman o zamin Badalte waqt ka aaina garmi-o-KHunki Ghurub-e-mahr mein rangon ka jagta jadu Shafaq ke shish-mahal mein gudaz-e-pinhan se Jawahron ki chaTanen si kuch pighalti huin Shajar hajar ki wo kuch sochti hui duniya Suhani raat ki manus ramaziyat ka fusun Alassabah ufuq ki wo thartharaati bhawen Kisi ka jhankna aahista phuTti pau se Wo dopahar ka samay darja-e-tapish ka chaDhaw Thaki thaki si faza mein wo zindagi ka utar Hua ki bansiyan banswaDiyon mein bajti huin Wo din ke baDhte hue sae sah-pahar ka sukun Sukut sham ka jab donon waqt milte hain Gharaz jhalakte hue sarsari manazir par Mujhe guman paristaniyat ka hota tha Har ek chiz ki wo KHwab-nak asliyyat Mere shuur ki chilman se jhankta tha koi Liye rububiyat-e-kaenat ka ehsas Har ek jalwe mein ghaib o shuhud ka wo milap Har ek nazara ek aaina-KHana-e-hairat Har ek manzar-e-manus ek hairat-zar Kahin rahun kahin khelon kahin paDhun likhun Mere shuur pe manDlate the manazir-e-dahr Main akasr un ke tasawwur mein Dub jata tha Wafur-e-jazba se ho jati thi mizha pur-nam Mujhe yaqin hai in unsuri manazir se Ki aam bachchon se leta tha main ziyaada asar Kisi samay meri tifli rahi na be-parwa Na chhu saki meri tifli ko ghaflat-e-tifli Ye khel-kud ke lamhon mein hota tha ehsas Duaen deta ho jaise mujhe sukut-e-dawam Ki jaise hath abad rakh de dosh-e-tifli par Har ek lamha ke raKHnon se jhankti sadiyan Kahaniyan jo sunun un mein Dub jata tha Ki aadmi ke liye aadmi ki jag-biti Se baDh ke kaun si shai aur ho hi sakti hai Inhi fasanon mein pinhan the zindagi ke rumuz Inhi fasanon mein khulte the raaz-ha-e-hayat Unhen fasanon mein milti thin zist ki qadren Rumuz-e-besh-baha TheTh aadmiyat ke Kahaniyan thin ki sad-dars-gah-e-riqqat-e-qalb Har ek kahani mein shaistagi-e-gham ka sabaq Wo unsur aansuon ka dastan-e-insan mein Wo nal-daman ki katha sarguzasht-e-sawitri 'shakuntla' ki kahani 'bharat' ki qurbani Wo marg-e-bhishm-pitamah wo sej tiron ki Wo pancho panDaw ki sowarg-yatra ki katha Watan se ruKHsat-e-'siddhaarth' 'ram' ka ban-bas Wafa ke baad bhi 'sita' ki wo jala-watani Wo raaton-raat 'siri-krishn' ko uThae hue Bala ki qaid se 'basdew' ka nikal jaana Wo andhkar wo barish, baDhi hui jamuna Gham-e-afrin kahani wo 'hir' 'ranjha' ki Shuur-e-hind ke bachpan ki yaadgar-e-azim Ki aise waise taKHayyul ki sans ukhaD jae Kai muhayyur-e-idrak dew-malayen Hitopdesh ke qisse katha sarat-sagar KaroDon sinon mein wo gunjta hua aalha Main puchhta hun kisi aur malak walon se Kahaniyon ki ye daulat ye be-baha daulat Fasane dekh lo in ke nazar bhi aati hai Main puchhta hun ki gahware aur qaumon ke Base hue hain kahin aisi dastanon se Kahaniyan jo main sunta tha apne bachpan mein Mere liye wo na thin mahz bais-e-tafrih Fasanon se mere bachpan ne sochna sikha Fasanon se mujhe sanjidgi ke dars mile Fasanon mein nazar aati thi mujh ko ye duniya Gham o KHushi mein rachi pyar mein basai hui Fasanon se mere dil ne ghulawaTen pain Yahi nahin ki mashahir hi ke afsane Zara si umr mein karte hon mujh ko mutassir Mohalle Tole ke gumnam aadamiyyon ke Kuchh aise sunne mein aate the waqiat-e-hayat Jon yun to hote the farsuda aur mamuli Magar the aaine iKHlas aur sharafat ke Ye chand aai gai baaten aisi baaten thin Ki jin ki oT chamakta tha dard-e-insani Ye wardat nahin razmiyye hayat ke the Gharaz ki ye hain mere bachpane ki taswiren Nadim aur bhi kuch KHatt-o-KHal hain un ke Ye meri man ka hai kahna ki jab main bachcha tha Main aise aadmi ki god mein na jata tha Jo bad-qimar ho aibi ho ya ho bad-surat Mujhe bhi yaad hai nau das baras hi ka main tha To mujh pe karta tha jadu sa husn-e-insani Kuchh aisa hota tha mahsus jab main dekhta tha Shagufta rang tar-o-taza rup walon ka Ki un ki aanch meri haDDiyan gala degi Ek aazmaish-e-jaan thi ki tha shuur-e-jamal Aur us ki nashtariyyat us ki ustuKHan-sozi Gham o nashat lagawaT mohabbat o nafrat Ek intishaar-e-sakun iztirab pyar itab Wo be-panah zaki-ul-hisi wo hilm o ghurur Kabhi kabhi wo bhare ghar mein hiss-e-tanhai Wo wahshaten meri mahaul-e-KHush-gawar mein bhi Meri sarisht mein ziddain ke kai joDe Shurua hi se the maujud aab-o-tab ke sath Mere mizaj mein pinhan thi ek jadaliyyat Ragon mein chhuTte rahte the be-shumar anar Nadim ye hain mere baal-pan ke kuch aasar Wafur o shiddat-e-jazbaat ka ye aalam tha Ki kaunde jast karen dil ke aabgine mein Wo bachpana jise bardasht apni mushkil ho Wo bachpana jo KHud apni hi tewriyan si chaDhae Nadim zikr-e-jawani se kanp jata hun Jawani aai dabe panw aur yun aai Ki us ke aate hi bigDa bana-banaya khel Wo KHwahishat ke jazbaat ke umaDte hue Wo honkte hue be-nam aag ke tufan Wo phuTta hua jwala-mukhi jawani ka Ragon mein uThti hui aandhiyon ke wo jhaTke Ki jo tawazun-e-hasti jhinjhoD ke rakh den Wo zalzale ki pahaDon ke pair ukhaD jaen Bulughiyat ki wo Tisen wo karb-e-nashw-o-numa Aur aise mein mujhe byaha gaya bhala kis se Jo ho na sakti thi hargiz meri sharik-e-hayat Hum ek dusre ke waste bane hi na the Siyah ho gai duniya meri nigahon mein Wo jis ko kahte hain shadi-e-KHana-abaadi Mere liye wo bani bewgi jawani ki LuTa suhag meri zindagi ka manDo mein Nadim kha gai mujh ko nazar jawani ki Bala-e-jaan mujhe ho gaya shuur-e-jamal Talash-e-shola-e-ulfat se ye hua hasil Ki nafraton ka agan-kunD ban gai hasti Wo halq o sina o rag rag mein be-panah chubha Nadim jaise nigal li ho main ne nag-phani Z ishq-zadam o ishqam kamusht zar-o-daregh KHabar na burd ba-rustam kase ki sohrabam Na puchh aalam-e-kaam-o-dahan nadim mere Samar hayat ka jab rakh bin gaya munh mein Main chalti-phirti chita ban gaya jawani ki Main kandha deta raha apne jite murde ko Ye sochta tha ki ab kya karun kahan jaun Bahut se aur masaib bhi mujh pe TuT paDe Main DhunDhne laga har samt sachchi jhuTi panah Talash-e-husn mein sher-o-adab mein dosti mein Rundhi sada se mohabbat ki bhik mangi hai Nae sire se samajhna paDa hai duniya ko BaDe jatan se sambhaala hai KHud ko main ne nadim Mujhe sambhalne mein to chaalis sal guzre hain Meri hayat to wish-pan ki katha hai nadim Main zahr pi ke zamane ko de saka amrit Na puchh main ne jo zahraba-e-hayat piya Magar hun dil se main is ke liye sipas-guzar Larazte hathon se daman KHulus ka na chhaTa Bacha ke rakkhi thi main ne amanat-e-tifli Ise na chhin saki mujh se dast-burd-e-shabab Ba-qaul shaer-e-mulk-e-farang har bachcha KHud apne ahd-e-jawani ka bap hota hai Ye kam nahin hai ki tifli-e-rafta chhoD gai Dil-e-hazin mein kai chhoTe chhoTe naqsh-e-qadam Meri ana ki ragon mein paDe hue hain abhi Na jaane kitne bahut narm ungliyon ke nishan Hanuz waqt ke be-dard hath kar na sake Hayat-e-rafta ki zinda nishaniyon ko fana Zamana chhin sakega na meri fitrat se Meri safa mere tahtush-shuur ki ismat TaKHaiyyulat ki doshizgi ka radd-e-amal Jawan ho ke bhi be-laus tifl-wash jazbaat Syana hone pe bhi ye jibillaten meri Ye sarKHushi o gham be-riya ye qalb-gudaz Baghair bair ke an-ban gharaz se pak tapak Gharaz se pak ye aansu gharaz se pak hansi Ye dasht-e-dahr mein hamdardiyon ka sar-chashma Qubuliyat ka ye jazba ye kaenat o hayat Is arz-e-pak par iman ye ham-ahangi Har aadmi se har ek KHwab o zist se ye lagaw Ye man ki god ka ehsas sab manazir mein Qarib o dur zamin mein ye bu-e-wataniyyat Nizam-e-shams-o-qamar mein payam-e-hifz-e-hayat Ba-chashm-e-sham-o-sahar mamta ki shabnam si Ye saz o dil mein mere naghma-e-analkaunain Har iztirab mein ruh-e-sukun-e-be-payan Zamana-e-guzaran mein dawam ka sargam Ye bazm-e-jashn-e-hayat-o-mamat sajti hui Kisi ki yaad ki shahnaiyan si bajti hui Ye ramaziyat ke anasir shuur-e-puKHta mein Falak pe wajd mein lati hai jo farishton ko Wo shaeri bhi bulugh-e-mizaj-e-tifli hai Ye nashtariyyat-e-hasti ye is ki sheriyat Ye patti patti pe gulzar-e-zindagi ke kisi Latif nur ki parchhaiyan si paDti hui Baham ye hairat o manusiyat ki sargoshi Bashar ki zat ki mahr-e-uluhiyat ba-jabin Abad ke dil mein jaDen marta hua sabza Gham-e-jahan mujhe aankhen dikha nahin sakta Ki aankhen dekhe hue hun main ne apne bachpan ki Mere lahu mein abhi tak sunai deti hain Sukut-e-huzn mein bhi ghunghruon ki jhankaren Ye aur baat ki main is pe kan de na sakun Isi wadiat-e-tifli ka ab sahaara hai Yahi hain marham-e-kafur dil ke zaKHmon par Unhi ko rakhna hai mahfuz ta-dam-e-aKHir Zamin-e-hind hai gahwara aaj bhi hamdam Agar hisab karen das karoD bachchon ka Ye bachche hind ki sab se baDi amanat hain Har ek bachche mein hain sad-jahan-e-imkanat Magar watan ka hal-o-aqd jin ke hath mein hai Nizam-e-zindagi-e-hind jin ke bas mein hai Rawayya dekh ke un ka ye kahna paDta hai Kise paDi hai ki samjhe wo is amanat ko Kise paDi hai ki bachchon ki zindagi ko bachae KHarab hone se Talne se sukh jaane se Bachae kaun in aazurda honhaaron ko Wo zindagi jise ye de rahe hain bhaarat ko KaroDon bachchon ke miTne ka ek alamiyya hai Churae jate hain bachche abhi gharon se yahan Ki jism tod diye jaen un ke taki mile Churane walon ko KHairaat magh-mele ki Jo is azab se bach jaen to gale paD jaen Wo lanten ki hamare karoDon bachchon ki Nadim KHair se miTTi KHarab ho jae Wo muflisi ki KHushi chhin le wo be-bargi Udasiyon se bhari zindagi ki be-rangi Wo yasiyat na jis ko chhue shua-e-umid Wo aankhen dekhti hain har taraf jo be-nuri Wo TukTuki ki jo pathra ke rah gai ho nadim Wo be-dili ki hansi chhin le jo honTon se Wo dukh ki jis se sitaron ki aankh bhar aae Wo gandagi wo kasafat maraz-zada paikar Wo bachche chhin gae hon jin se bachpane un ke Hamin ne ghonT diya jis ke bachpane ka gala Jo khate-pite gharon ke hain bachche un ko bhi kya Samaj phulne-phalne ke de saka sadhan Wo sans lete hain tahzib-kush fazaon mein Hum un ko dete hain be-jaan aur ghalat talim Milega ilm-e-jihaalat-numa se kya un ko Nikal ke madrason aur uniwersitiyyon se Ye bad-nasib na ghar ke na ghaT ke honge Main puchhta hun ye talim hai ki makkari KaroDon zindagiyon se ye be-panah dagha Nisab aisa ki mehnat karen agar is par Bajae ilm jahaalat ka iktisab karen Ye ulTa dars-e-adab ye saDi hui talim Dimagh ki ho ghiza ya ghiza-e-jismani Har ek tarah ki ghiza mein yahan milawaT hai Wo jis ko bachchon ki talim kah ke dete hain Wo dars ulTi chhuri hai gale pe bachpan ke Zamin-e-hind hinDola nahin hai bachchon ka KaroDon bachchon ka ye des ab janaza hai Hum inqalab ke KHatron se KHub waqif hain Kuchh aur roz yahi rah gae jo lail-o-nahaar To mol lena paDega hamein ye KHatra bhi Ki bachche qaum ki sab se baDi amanat hain