jaur o be mehrii e igmaaz pe kya rotaa hai

Jaur-o-be-mehree-e-ighmaaz pe kya rotaa hai Mehrbaan bhee koi ho jaa.egaa jaldee kya hai Kho diyaa tum ko to ham poochhte phirte hain yahee Jis kee taqdeer bigaD jaa.e wo kartaa kya hai Dil kaa ik kaam jo hota nahin ik muddat se Tum zaraa haath lagaa do to huaa rakkhaa hai Nigah-e-shokh men aur dil men hain choTen kya kya Aaj tak ham na samajh paa.e ki jhagDaa kya hai Ishq se tauba bhee hai husn se shikve bhee hazaar Kahiye to hazrat-e-dil aap kaa manshaa kya hai Zeenat-e-dosh tiraa naama-e-a.amaal na ho Teree dastaar se vaa.iz ye laTaktaa kya hai Haan abhee vaqt kaa aa.eena dikhaa.e kya kya Dekhte jaao zamaana abhee dekhaa kya hai Na yagaane hain na begaane tiree mahfil men Na koi ghair yahaan hai na koi apna hai Nigah-e-mast ko jumbish na hui go sar-e-bazm Kuch to is jaam-e-labaa-lab se abhee chhalkaa hai Raat-din phirtee hai palkon ke jo saa.e saa.e Dil miraa us nigah-e-naaz kaa deevaanaa hai Ham judaa.ee se bhee Kuch kaam to le hee lenge Be-niyaazaana ta.alluq hee chhuTaa achchhaa hai Un se baDh-chaDh ke to ai dost hain yaaden in kee Naaz-o-andaaz-o-adaa men tiree rakkhaa kya hai Aisee baaton se badaltee hai kaheen fitrat-e-husn Jaan bhee de de agar koi to kya hota hai Tiree aankhon ko bhee inkaar tiree zulf ko bhee Kis ne ye ishq ko deevaana banaa rakkhaa hai Dil tiraa jaan tiree aah tiree ashk tire Jo hai ai dost wo teraa hai hamaaraa kya hai Dar-e-daulat pe duaa.en see sunee hain main ne Dekhiye aaj faqeeron kaa kidhar pheraa hai Tujh ko ho jaa.enge shaitaan ke darshan vaa.iz Daal kar munh ko garebaan men kabhi dekhaa hai Ham kahe dete hain chaalon men na aao un kee Sarvat-o-jaah ke ishvon se bacho dhokaa hai Yahee gar aankh men rah jaa.e to hai chingaaree Qatra-e-ashk jo bah jaa.e to ik Dariya hai Zulf-e-shab-goon ke sivaa nargis-e-jaadoo ke sivaa Dil ko Kuch aur balaaon ne bhee aa gheraa hai Lab-e-ejaaz kee saugand ye jhankaar thee kya Teree khaamoshee ke maanind abhee Kuch TuuTaa hai Daar par gaah nazar gaah soo-e-shahr-e-nigaar Kuch sunen ham bhee to ai ishq iraada kya hai Aa ki ghurbat-kada-e-dahr men jee bahlaa.en Ai dil us jalva-gah-e-naaz men kya rakkhaa hai Zakhm hee zakhm hoon main sub.h kee maanind 'firaaq' Raat bhar hijr kee lazzat se mazaa luuTaa hai