jise log kahte hain tiirgii vahii shab hijaab e sahar bhi hai

Jise log kahte hain teergee vahee shab hijaab-e-sahar bhee hai Jinhen be-khudee-e-fanaa milee unhen zindagee kee khabar bhee hai Tire ahl-e-deed ko dekh ke kabhi khul sakaa hai ye raaz bhee Unhen jis ne ahl-e-nazar kiyaa wo tiraa kharaab-e-nazar bhee hai Ye visaal-o-hijr kee bahs kya ki ajiib chiiz hai ishq bhee Tujhe paa ke hai vahee dard-e-dil vahee rang-e-zakhm-e-jigar bhee hai Ye naseeb-e-ishq kee gardishen ki zamaan makaan se guzar ke bhee Vahee aasmaan vahee shaam-e-gham vahee shaam-e-gham kee sahar bhee hai Tire kaif-e-husn kee jaan hai miree be-dilee-o-fasurdagee Jise kahte hain gham-e-raa.egaan wo liye hue Kuch asar bhee hai Na raha hayaat kee manzilon men wo farq-e-naaz-o-niyaaz bhee Ki jahaan hai ishq barahna-paa vaheen husn khaak-basar bhee hai Wo gham-e-firaaq bhee kaT gaya wo malaal ishq bhee miT gaya Magar aaj bhee tire haath men vahee aasteen hai ki tar bhee hai Dam-e-hashr azal kee bhee yaad kar ye zabaan kya ye nigaah kya Jo kisee se aaj na ho sakaa wo savaal baar-e-digar bhee hai Jo visaal-o-hijr se duur hai jo karam sitam se hai be-khabar Kuch uThaa huaa hai wo dard bhee Kuch uThee huee wo nazar bhee hai Ye pata hai us kee inaayaton ne kharaab kitnon ko kar diyaa Ye khabar hai nargis-e-neem-vaa ki girah men fitna-e-shar bhee hai Usee shaam-e-marg kee teergee men hain jalva-haa-e-hayaat bhee Unheen zulmaton ke hijaab men ye chamak ye raqs-e-sharar bhee hai Vahee dard bhee hai davaa bhee hai vahee maut bhee hai hayaat bhee Vahee ishq naavak-e-naaz hai vahee ishq seena-sipar bhee hai Too zamaan makaan se guzar bhee jaa too rah-e-adam ko bhee kaaT le Wo savaab ho ki azaab ho kaheen zindagee se mafar bhee hai Jo gale tak aa ke aTak gaya jise talkh-kaam na pee sake Wo lahoo kaa ghoonT utar gaya to sunaa hai sheer-o-shakar bhee hai Koi ahl-e-dil ko kamee nahin magar ahl-e-dil kaa ye qaul hai Abhee maut bhee nahin mil sakee abhee zindagee men kasar bhee hai BaDee chiiz daulat-o-jaah hai baDee vus.aten hain naseeb use Magar ahl-e-daulat-o-jaah men kaheen aadmee kaa guzar bhee hai Ye shab-e-daraaz bhee kaT ga.ee wo sitaare Duube wo pau phaTee Sar-e-raah ghaflat-e-khvaab se ab uTho ki vaqt-e-sahar bhee hai Jo ulaT chuke hain bisaat-e-dahr ko agle vaqton men baarhaa Vahee aaj gardish-e-bakht hai vahee rang-e-daur-e-qamar bhee hai Na gham-e-azaab-o-savaab se kabhi chheD fitrat-e-ishq ko Jo azal se mast-nigaah hai use nek-o-bad kee khabar bhee hai Wo tamaam shukr-o-razaa sahee wo tamaam sabr-o-sukoon sahee Too hai jis se maa.il-e-imtihaan wo farishta hai to bashar bhee hai Na kaho taghaaful-e-husn se koi kaar-saazee-e-gham kare Ki jo aaj gham se nikal ga.ee wo duaa kharaab asar bhee hai Tire gham kee umr-e-daraaz men ka.ee inqalaab hue magar Vahee tool-e-shaam-e-'firaaq' hai vahee intizaar-e-sahar bhee hai